DILI, STLTIMORLESTE.com – Eskola Sekundariu Jeral ESJ 12 de Novembro presiza aumenta sala aula atu bele hamenus turnu rua sai ida no kompleta oras hanorin.
Diretór ESJ 12 de Novembro, Marculino Menezes Babo hato’o pedidu ne’e ba STL, Sesta (11/09/2026).
Nia hatete, eskola hasoru dezafiu tanba prosesu aprendizajen uza komputador, projetor no internet Starlink, ne’ebé kustu aas.
“Ami presiza tan sala aula atu bele halo turnu ida deit, tanba agora prosesu aprendizajen lao ho turnu rua,” dehan nia.
Marculino dehan, aumentu sala aula sei ajuda eskola kompleta karga oráriu no evita redusaun oras hanorin.
“Disiplina balun hanorin oras haat, maibé ami reduz ba oras tolu tanba turnu rua,” nia afirma.
Nia esplika, se oras hanorin kompletu, turnu dadeer sei remata tarde no turnu lokraik bele too tuku 7.
“Turnu dadeer remata tuku 2:30, turnu meudia hahu tuku 1:00 to’o 5:45. Ida ne’e mak dezafiu,” nia esklarese.
Diretór mos hatete, internet ne’ebé uza ba aula online dala barak la diak, enkuantu Starlink presiza kustu aas.
Iha parte seluk, Diretór ESJ 5 de Maio Becora, Julio Maia Castro de Jesus dehan, profesór sira hanorin tuir karga oráriu determina.
Nia hatete, kada profesór iha obrigasaun atu kumpre oras hanorin hamutuk 24 oras kada semana.
Estudante ESJ 4 de Setembro Balide, Lucio da Costa hatete, profesór sira kontinua hanorin tuir oráriu ne’ebé determina ona.
“Ami tama aula tuir disiplina kada profesór. Sala aprendizajen sufisiente atu apoia prosesu ensinu no aprendizajen,” dehan nia.
Lucio afirma, estudante sira tenke ativu, la falta eskola no nafatin estuda maski iha limitasaun oras.
Enkuantu ne’e, estudante ESJ 10 de Dezembro Comoro, Mariana do Carmo hatete, sira eskola turnu meudia.
“Ami eskola meudia tanba dadeer estudante ensinu baziku sira uza edifísiu eskola ne’e,” nia koalia.
Mariana dehan, maski eskola iha turnu meudia, estudante sira nafatin iha vontade atu tuir aula no kumpre oráriu.
(jac)
