DILI, STLTIMORLESTE.com – Eskola sira iha area remotas Munisípiu Manatuto presiza aumenta manorin, tanba too agora númeru manorin seidauk sufisiente atu kobre nesesidade eskola sira.
Haktuir Diretor Servisu Edukasaun Munisípiu Manatuto, Luis Antonio Soares ba STL liu husi telefone, Sesta nee (11/09/2026).
“Depois ita nian númeru ba manorin, maski iha ona, maibé too agora manorin seidauk sufisiente ba ita nian eskola sira iha Munisípiu Manatuto. Maibé ita bele responde ona iha eskola balun, ita nafatin nesesita, tanba liga ba politika ME nian ho KFP ba reforma nian, ne’ebé mak dadaun ne’e lao hela,” nia informa.
Nia dehan, iha manorin barak sei tama iha idade reforma, tanba iha manorin balun ne’ebé tama reforma iha tinan ne’e no iha tinan kotuk. Tanba ne’e, eskola ne’ebé presiza aumenta manorin tenke haree didiak tuir dadus.
“Ita nian manorin ne’ebé dadaun ne’e iha ona, maibé seidauk sufisiente. Nune’e ita presiza aumenta tan, tanba ita nian professor ne’ebé iha, balun idade reforma ona, balun reforma iha tinan kotuk. Nune’e, iha sira nian fatin ne’e ita presiza substitui fila fali iha sira nian fatin ne’ebé sei mamuk,” nia dehan.
(jac)
