DILI, STLTIMORLESTE.com — Primeiru-Ministru Kay Rala Xanana Gusmão afirma, Governu sei foti medidas maka’as atu kombate atividade Scam Call Centre ne’ebé buras iha Timor-Leste, inklui deportasaun sidadaun estranjeiru.
Xanana hato’o deklarasaun ne’e ba jornalista sira hafoin enkontru semanál ho Prezidente Repúblika José Ramos-Horta, iha Palásiu Prezidensiál Bairru Pite Dili, Sesta (11/09/2026).
Nia hateten, sidadaun estranjeiru sira ne’ebé envolve iha atividade Scam Call Centre sei deporta direta ba sira-nia nasaun origem.
“Kazu Scam Call Centre buras iha Timor-Leste. Ne’e mak agora ita atu haruka sai ba Bali. Bali la simu, dehan ida-ne’e ami la simu. Ne’e mak sei kombina ho ema sira rai-nian. Ami dehan ami kaer, haruka aviaun mai lori sira ba,” Xanana hateten.
Primeiru-Ministru esplika katak, Governu la bele haree problema ne’e nu’udar buat ki’ik, tanba atividade ne’e bele lori impaktu finanseiru ba Timor-Leste.
Nia hateten, se sidadaun estranjeiru sira deporta liuhusi Aero Dili no sira nia nasaun origem, inklui Xina, la simu sira, Governu sei ko’ordena ho autoridade relevante sira atu determina destinu no prosesu ne’ebé tenke tuir.
“Tanba sira mai estraga Timor, Timor mak selu fali sira. Ne’e mak dehan sai, nia atu sai husi ne’ebé, osan iha ne’ebé, ne’e mak iha hela kontaktu ho reprezentante rai sira ne’e nian,” Xanana afirma.
Governu, tuir Xanana, sei kontinua halo koordenasaun ho autoridade no reprezentante nasaun sira ne’ebé relevante atu garante prosesu deportasaun no kombate Scam Call Centre lao tuir mekanismu ne’ebé apropriadu.
(jos)
