DÍLI, STLTIMORLESTE.com – Komando Polísia Nasional Timor-Leste (PNTL) Munisipiu Dili apela ba joven sira atu evita konsumu tua iha simitériu durante selebrasaun Loron Finadu, hodi prevene konflitu.
Komandante PNTL Munisipiu Dili, Komisáriu Asistente Polísia Orlando Gomes hato’o apelu ne’e iha Eskuadra Dom Alexo, Aimutin, Dili, Tersa-feira (27/10/2026).
Nia husu joven sira atu selebra Loron Finadu ho responsabilidade, lori ai-funan ba rate família nian, no evita hahalok ne’ebé bele hamosu konflitu.
“Komando PNTL Munisipiu Dili apela ba joven sira atu iha konsiénsia. Selebra Loron Finadu ho lori ai-funan ba matebian sira, no labele hemu tua atu prevene konflitu,” Orlando Gomes hatete ba STL.
Orlando esplika katak, PNTL bandu joven sira atu lori no konsume tua iha simitériu, tanba konsumu alkól bele provoka konflitu no afeta ema seluk.
“Ita bandu labele lori tua ba simitériu no konsume iha ne’ebá, tanba bele hamosu konflitu no afeta ema seluk,” nia afirma.
Iha parte seluk, komunidade Suku Comoro, Postu Administrativu Dom Alexo, José Soares husu PNTL atu hametin seguransa durante Loron Finadu.
Nia dehan katak, Loron Finadu nu’udar momentu importante ba família sira atu vizita rate inan-aman, avo no família sira ne’ebé mate ona, hodi husu bensaun no hakmatek.
“Loron Finadu importante atu vizita rate família nian. Tanba ne’e, husu Polísia atu fó seguransa máximu, tanba ema balu bele aproveita momentu ne’e hodi kria konflitu tanba hemu tua,” José Soares afirma.
(jen)
