DILI, STLTIMORLESTE.com – Fundasaun Alola no Companhia Santos organiza Konkursu Bebé Isin-Di’ak iha Zumalai, promove susubeen eksklusivu no saúde bebé.
Atividade ne’e realiza iha Sentru Saúde Zumalai, Tersa-feira (15/9), nu’udar parte husi selebrasaun Loron Mundial Susubeen Inan nian, ho partisipasaun membru Suku Hadomi Inan no Oan (SHIO).
Atividade ne’e mos sai hanesan atividade dahuluk husi série atividade saúde ne’ebé sei hala’o iha suku tolu iha Postu Administrativu Zumalai, atu promove importánsia fó susubeen inan nian de’it durante fulan neen primeiru no kuidadu durante Loron Rihun Ida Dahuluk.
Reprezentante Servisu Munisipal Apoiu ONG Postu Zumalai, Marcos Gusmao, hatete selebrasaun ne’e fó apresiasaun ba esforsu inan sira nian iha kuidadu no fó susu ba oan.
“Selebrasaun Loron Mundial Susubeen Inan nian ne’e fó folin ba inan sira ne’ebé servisu maka’as atu responsabiliza fó susu ba ita-nia oan sira. Hadomi ita-nia oan sira hanesan ita-nia an rasik,” dehan Marcos Liu husi komunikadu imprensa neebe diariu nee asesu husi media Fundasaun Alola, Kuarta (16/09/2026).
Nia hatete tema atividade ne’e iha misaun atu kontribui ba kriasaun jerasaun saudável liuhusi promosaun susubeen inan nian.
“Jerasaun saudável ne’e mai husi ne’ebé? Mai husi investimentu susubeen. Investimentu susubeen ne’e liuhusi ita fó susu ba oan sira,” nia esplika.
Koordenador Projeitu Programa Saúde Inan no Oan Fundasaun Alola, Moises da Silva, hatete konkursu ne’e aplika kritéria espesífiku ba bebé sira ne’ebé partisipa.
Kritéria sira inklui bebé tenke partu iha fasilidade saúde no hetan susubeen inan nian de’it durante fulan neen primeiru, la’ós hahán ka bebida seluk.
Husi prosesu seleksaun, bebé hamutuk 15 mak kumpre kritéria no sai manán-na’in iha konkursu ne’e.
“Ami la bele foti inan hotu-hotu, maibé ami foti de’it inan sanulu-resin-lima husi Sentru Saúde Zumalai, atu nune’e bele sai modelu ba inan sira seluk iha tinan sira tuir mai,” dehan Moises.
Xefe Sentru Saúde Covalima, Alianca dos Reis Gomes, hato’o apresiasaun ba Fundasaun Alola no Companhia Santos tanba apoiu ba atividade saúde komunidade.
Nia hatete, limitasaun rekursu umanu iha servisu saúde, liuliu ba akonsellamentu no monitorizasaun inan ho oan iha uma, bele apoiu liuhusi kolaborasaun ho parseiru sira.
“Ha’u hanesan Xefe Sentru Saúde, ha’u hato’o agradese tebes ba apoiu husi Fundasaun Alola no Companhia Santos. Apoiu ne’e fasilita ami-nia membru SHIO sira atu halo akonsellamentu ba inan sira bainhira fila ona ba uma,” dehan Alianca.
Iha sorin seluk, reprezentante Companhia Santos, Silvya Abel, hatete dezenvolvimentu rekursu umanu presiza hahú husi inan no oan nu’udar investimentu ba futuru Timor-Leste.
“Timor-Leste iha rekursu barak, inklui mina no gás, minerais, kafé no rekursu oioin. Maibé rekursu ne’ebé importante liu mak rekursu umanu. Atu hadia rekursu umanu, ita tenke hahú husi inan ho oan, bainhira bebé sira sei iha inan kabun laran,” dehan Silvya.
Nia mos hato’o orgullu tanba Companhia Santos bele envolve iha programa saúde komunidade liuhusi kolaborasaun ho Fundasaun Alola no autoridade lokál.
“Ami sente orgullu servisu hamutuk ho Fundasaun Alola no autoridade lokál sira, inklui sentru saúde, liuhusi programa saúde inan no oan. Mai ita kontinua apoiu ba inan ho oan sira atu bele kria jerasaun ne’ebé saudável,” nia hatete.
Nu’udar forma apresiasaun, ekipa Fundasaun Alola no Companhia Santos entrega prezente espesiál ba manán-na’in 15. Servisu Munisipal Apoiu ONG mos husu ba manán-na’in sira atu fahe informasaun kona-ba susubeen eksklusivu ho komunidade.
“Ita-boot sira na’in sanulu-resin-lima ne’e sai influénsia ba suku sira no bele fahe informasaun katak ita hetan prezente tanba kumpre kritéria ne’ebé ajuda labarik hetan saúde di’ak,” dehan Marcos.
Atividade selebrasaun sei kontinua iha Suku Fatuleto, Aldeia Nalaop, ho konkursu bebé isin-di’ak no demonstrasaun ai-han lokál. Programa sei kontinua ba Suku Zulo no Lour to’o Sesta-feira (18/9).
(dom)
