DILI, STLTIMORLESTE.com – Relasiona ho kazu neebe akontese iha area Colmera katak, iha Joven nain rua (2) deskonfia halo agresaun fiziku hasoru membru Polísia Nasional Timor-Leste (PNTL) neebe halao servisu hanesan Segurasa Pesoal ka eskolta ba Vise Ministru Justisa.
Segundu Komandante PNTL Munisipiu Dili, Supertendente Luis da Silva hatete, insidente ne’e mosu iha Kuarta dadersan, bainhira Membru Polísia halao nia knaar too iha area Colmera nian TORRETO nia oin, mak joven nain rua nee lakohi fo fatin atu liu, nunee sira para no tun diskute too baku malu.
Nia dehan, tuir informasaun neebe PNTL simu husi sidadaun sira katak, Membru PNTL ataka husi joven nain rua, depois hafoin simu informasaun Polísia Eskuarda Vera Cruz halo kedas atuasaun no haruka ekipa ba fatin akontesementu no halo kapturasaun ba suspeitu nain rua.
“Ohin oras tuku 09:30 OTL mosu problema iha area Colmera neebe joven nain rua ou nain haat hanesan sira atake ita nia Membru Polísia neebe servisu CSP no fo segurasa ba ba Vise Ministru Justisa,” hatete Segundo Komandante PNTL Munisipiu Dili, Supertendente Luis da Silva ba jornalista sira iha Komando PNTL Munisipiu Dili, kuarta (16/09/2026).
Nia esplika, bainhira simu telefone Komando PNTL Munisipiu Dili orienta kedas ekipa Task Force atu tun ba terenu hodi halo kapturasaun.
“Dadaun ami entrega ona ba Investigasaun Kriminal Eskuarda Vera Cruz hodi halo prosesu investigasaun,no sira hatama ona ba sela durante Oras 72 nia laran,” nia Informa.
Nia hatutan, depois halo detensaun Oras 72 ba joven nain rua ne’e,sei kontinua halo prosesu ba Ministeriu Publiku hodi lori ba tribunal, tanba probelma nee akontese flagranta delito.
“Hakarak ga lakohi prosesu tenke ba tribunal, tanba ida nee Krime Publiku, sidadaun nain rua ne’e ataka membru PNTL iha dalan no hahalok nee ladiak,” nia Informa.
Entretantu Membru CSP nee lori ona ba Hospital Nasional Guido Valadares (HNGV) hodi hetan tratamentu, tanba hetan agresaun fiziku.
(jen)
