DILI, STLTIMORLESTE.com — Institutu Nasionál Kombate HIV/SIDA (INCSIDA) hametin edukasaun no sensibilizasaun ba joven sira atu aumenta koñesimentu kona-ba prevensaun transmisaun HIV iha Timor-Leste.
Tuir Prezidente INCSIDA, Daniel Marçal, hateten katak joven sira iha papél importante iha esforsu prevensaun HIV, liuhusi koñesimentu kona-ba risku, métodu prevensaun no asesu ba tratamentu.
Iha Timor-Leste, joven sira reprezenta parte importante hosi populasaun. Tanba ne’e, edukasaun, sensibilizasaun no informasaun loos kona-ba HIV presiza hetan atensaun.
“Ita fo Koñesimentu kona-ba HIV ajuda joven sira komprende dalan transmisaun, risku relasionadu ho hahalok espesífiku no medida prevensaun ne’ebé apropriadu,” hatete Prezidente INCSIDA, Daniel Marçal ba jornalista sira iha salaun INCSIDA, Segunda (12/10/2026).
Aleinde ne’e, komunidade presiza evita diskriminasaun hasoru ema ne’ebé moris ho HIV. Sira tenke hetan respeitu, apoiu no asesu ba servisu saúde, inklui teste no tratamentu.
Iha fatin hanesan, téknika espesiálizada iha Ministériu Estadu Koordenadór Asuntu Sosiál (MECAS), Meliana Fatima esplika katak, INCSIDA iha ligasaun institusionál ho ministériu ne’e.
Nia hateten katak, MECAS kontinua halo koordenasaun no akompañamentu ba servisu INCSIDA, hamutuk ho instituisaun no ministériu relevante sira, atu hametin esforsu prevensaun HIV.
Koordenasaun ne’e importante atu identifika dezafiu sira no determina politika ne’ebé apropriadu hodi hadi’a servisu prevensaun no kombate HIV iha Timor-Leste.
Meliana Fatima mós subliña katak Governu kontinua fó apoiu ba tratamentu no formasaun, ho objetivu atu hamenus númeru kazu HIV no prevene aumentu iha futuru.
“Kuandu númeru kazu HIV aumenta, Governu presiza kontinua servisu hamutuk ho Ministériu Saúde atu promove prevensaun no responsabiliza ema ida-idak atu kuida nia saúde,” nia afirma.
Nia mós aviza katak, responsabilidade pesoál importante tebes iha prevensaun HIV, tanba ema ida-idak presiza komprende risku no foti medida apropriada atu proteje nia saúde.
Enkuantu ne’e, Pedro de Jesus Soares, nu’udar organizadór estudante sira ne’ebé partisipa iha atividade sensibilizasaun, hateten katak informasaun kona-ba prevensaun HIV importante ba juventude.
“Sensibilizasaun ne’e importante tebes ba juventude atu prevene HIV. Estudante sira presiza rona no komprende informasaun ne’e atu aplika medida prevensaun iha sosiedade,” nia afirma.
Partisipasaun ativa hosi joven sira, família, instituisaun edukativa no organizasaun sosiál sei kontinua sai elementu importante atu hametin edukasaun, prevene transmisaun HIV no promove respeitu ba ema ne’ebé moris ho HIV.
(jen)
