DILI, STLTIMORLESTE.com – Direjente eskola sira iha Dili afirma katak pagamentu subsídiu transporte ba kargu xefia no profesór sira lao normal, tuir montante ne’ebé determina.
Diretór Eskola Sekundária Jerál Públika 5 de Maio, Becora, Júlio Maia Castro de Jesus hatete ba STL, Segunda-feira (12/10), katak subsídiu transporte ba kargu xefia eskola nian la hasoru problema.
“Ami nia eskalaun iha nivel 4, no subsídiu transporte ba kargu xefia lao normal, hanesan bai-bain, laiha problema,” Júlio Maia informa.
Iha fatin seluk, Gabinete Apoiu Tékniku (GAT) EBC Manleuana, Narcísio P. S. V. da Costa, hatete katak durante nia asume kargu, subsídiu transporte lao normal.
“Durante hau asume kargu GAT, hau simu subsídiu transporte US$75 kada fulan, no osan ne’e tama hamutuk ho saláriu,” Narcísio dehan.
Nia hatutan katak, profesór sira simu subsídiu transporte US$ 25 kada fulan, enkuantu funsionáriu sira ne’ebé asume kargu xefia simu US$ 75.
Diretór EBC Manleuana, Carlos Correia, mós konfirma katak subsídiu transporte ba profesór sira mak US$ 25 kada fulan, no pagamentu lao normal.
“Subsídiu transporte ba ami adjuntu na’in rua mak US$ 75 kada fulan. Saláriu mós lao diak, maibé mudansa kargu xefia iha Janeiru to’o Marsu halo alterasaun,” Carlos Correia esplika.
Nia hatutan katak, pagamentu ba kargu xefia foun hahú iha Abril, no profesór foun ne’ebé koloka iha eskola ne’e mós simu subsídiu transporte hamutuk ho saláriu mensal.
Entretantu, Diretór Servisu Edukasaun Munisípiu Bobonaro, Miguel Freitas, dehan katak nia la bele fó komentáriu kona-ba asuntu ne’e, tanba la tama iha nia kompeténsia.
“Ba asuntu subsídiu transporte ne’e, diak liu husu ba Rekursu Umanu Nasionál, tanba la’ós hau nia kompeténsia,” Miguel Freitas dehan.
Iha parte seluk, Diretór Nasionál Rekursu Umanu iha Ministériu Edukasaun, João Amaral, husu jornalista sira atu tuir prosedimentu protokolu ministériu antes halo entrevista kona-ba alojamentu no subsídiu transporte ba profesór sira.
“Antes halo entrevista kona-ba asuntu ne’e, tenke liu hosi Protokolu Ministériu Edukasaun, depois mak ami bele fó komentáriu,” João Amaral esplika.
(jac)
