DILI, STLTIMORLESTE.com — Maski Governu promete atu hahú konstrusaun Jardín Farol to’o Pantai Kelapa iha Outubru 2026, to’o loron 13 fulan ne’e, konstrusaun seidauk hahú no movimentu servisu ruma mós la mosu iha terrenu.
Atrazu ne’e hamosu dúvida kona-ba realizasaun promesa Governu nian, tanba projetu ne’e konsidera importante ba embelezamentu kapitál Dili, atrai turista no kriasaun oportunidade negósiu ba komunidade lokál iha tasi-ibun.
Observadór Polítika, Samuel de Oliveira, kritika atrazu ne’e no konsidera katak, Governu presiza responsabiliza an ba promesa ne’ebé halo ona.
“MKAE dehan konstrusaun sei hahú iha Outubru, maibé to’o agora seidauk haree movimentu konstrusaun ruma. Laiha eskavadór, laiha traballadór. Ida ne’e falta responsabilidade,” Samuel de Oliveira dehan ba STL, iha Mandarin, Dili, Tersa (13/10/2026).
Tuir Samuel, razaun prinsipál ba atrazu ne’e mak Governu halo deklarasaun polítika, molok asegura preparasaun téknika no orsamentu.
Nia husu Ministériu Kordenasaun Asuntu Ekonomiku (MKAE) atu fó klarifikasaun, no Parlamentu Nasionál atu hametin fiskalizasaun ba projetu ne’e.
“Povu la presiza fatuk dahuluk no bandeira. Povu presiza jardín moos, estrada di’ak no fatin halimar ba labarik sira. Se promete, tenke kumpre,” nia hatutan.
Iha parte seluk, akademista Universidade Nasionál Timor Lorosa’e (UNTL), Abel de Araujo, mós hato’o preokupasaun kona-ba aspetu akadémiku, ambientál no kulturál husi projetu ne’e.
Abel konsidera katak projetu ne’e la’ós de’it kona-ba harii infraestrutura, maibé presiza konsidera jestaun espasu públiku, partisipasaun komunidade no preservasaun identidade Timor-Leste nian.
“Projetu dezenvolvimentu tenke bazeia ba dadus no transparénsia, hodi garante benefísiu ba públiku no preserva identidade Timor nian,” Abel de Araujo hateten.
Nia hatutan katak dezenvolvimentu sustentável presiza bazeia ba dadus no transparénsia, la’ós presaun polítika.
Tanba ne’e, nia husu MKAE atu fó informasaun klaru kona-ba lisensa ambientál, dezeñu final no orsamentu projetu nian.
Antes ne’e, Vise-Primeiru-Ministru, Ministru Kordenadór Asuntu Ekonomiku no Ministru Turizmu no Ambiente, Francisco Kalbuadi Lay, hamutuk ho Embaixadora Xina ba Timor-Leste, asina ona akordu konstrusaun Jardín Farol to’o Pantai Kelapa, iha oin Embaixada Malázia.
Francisco Kalbuadi Lay hatete katak reprezentante Governu Xina no Governu Timor-Leste hahú ona halo levantamentu iha área tasi-ibun, hosi Farol to’o Pantai Kelapa, tinan tolu liubá.
Nia esplika katak projetu ne’e hetan apoiu husi Governu Xina, liuhusi esforsu Embaixadora Xina, to’o hetan aprovasaun husi Governu sentrál Xina.
Iha deklarasaun antes ne’e, Francisco Kalbuadi Lay hatete katak konstrusaun projetu ne’e espera atu hahú iha Outubru 2026 no remata iha 2028, molok Timor-Leste simu responsabilidade hanesan Prezidénsia ASEAN iha 2029.
(car)
