DILI, STLTIMORLESTE.com – Aumentu saláriu mínimu bele hasa’e presu matéria-prima no aumenta risku dezempregu, maibé mós bele aumenta poder komprasaun trabalhador sira.
Diretór MG Padaria, Duarte da Costa Tilman hato’o preokupasaun ne’e ba STL iha Delta, Dili, Tersa-feira (13/10/2026).
Nia hatete katak, aumentu saláriu mínimu bele halo empreza no fornecedór sira hasa’e saláriu trabalhador, ne’ebé bele afeta presu sasán no matéria-prima.
“Ami nia gastu ba matéria-prima sei aumenta. Ami husu, governu bele garante presu sasán iha merkadu nafatin normál ka lae?” dehan Duarte.
Nia esplika katak, se presu matéria-prima aumenta, empreza mikro no ki’ik sira sei hasoru difikuldade atu sustenta negósiu no selu trabalhador.
Duarte hatutan katak, empreza sira iha kategoria boot, médiu, mikro no ki’ik. Tanba ne’e, polítika saláriu mínimu ho montante hanesan bele fó impaktu boot liu ba empreza ki’ik.
Nia preokupa katak, se kustu operasionál aumenta, empreza balu bele reduz númeru trabalhador atu garante negósiu kontinua lao ho efisiénsia.
Iha sorin seluk, Prezidente Konfederasaun Sindikatu Timor-Leste, Almerio Vila Nova, hatete katak, aumentu saláriu mínimu iha impaktu pozitivu no negativu ba ekonomia.
Nia konsidera impaktu negativu bele afeta empreza sira ne’ebé hasoru difikuldade finanseira. Maibé, nia afirma katak aumentu saláriu bele hadi’a kondisaun ekonomika trabalhador no família sira.
“Bainhira saláriu mínimu sae, poder komprasaun trabalhador no família aumenta. Osan ne’ebé sira gasta iha merkadu lokál sei sirkula iha rai laran,” dehan Almerio.
Nia hatutan katak, osan ne’ebé trabalhador sira gasta iha merkadu lokál bele fila fali ba empreza sira hanesan rendimentu, hodi ajuda sira kontinua dezenvolve negósiu no selu trabalhador.
Almerio mós afirma katak, aumentu saláriu mínimu bele fó motivasaun ba trabalhador atu servisu maka’as liután no aumenta produtividade.
Entretantu, Koordenadór Jerál Gabinete Ministru Koordenadór Asuntu Ekonomiku, Jorge Rei de Carvalho Martins, hatete katak, relasaun entre aumentu saláriu mínimu, inflasaun no desempregu presiza analiza bazeia ba dadus no evidénsia.
“Presiza haree impaktu aumentu saláriu mínimu, maibé mós kria oportunidade empregu foun, promove investimentu privadu no aumenta produtividade,” dehan Jorge iha konferénsia imprensa.
Nia hatutan katak, governu presiza prepara medida atu apoia empreendedór no empreza lokál sira, hodi ajuda sira dezenvolve negósiu no responde ba mudansa kustu operasionál.
Jorge mós subliña katak, inflasaun presu tenke analiza bazeia ba evidénsia, la’ós uza inflasaun nu’udar razaun atu evita aumentu saláriu mínimu.
(dom)
