DILI, STLTIMORLESTE.com — Prezidente Partidu Demokratiku (PD), Mariano Assanami Sabino, apela ba militante sira atu hametin unidade, solidariedade no identidade partidária, hodi kontinua hamutuk enfrenta dezafiu polítiku no kontribui ba dezenvolvimentu nasionál.
Apelu ne’e hato’o iha ninia diskursu durante Konferénsia Partidu Demokratiku Munisípiu Dili ba dala IV, ho tema “Tinan 25, Lao Hamutuk ba Novu Orizonte: Hun Ida, Abut Ida, Povu Ida, Rai Timor Ida De’it”, ne’ebé hala’o iha Salaun Sentru Konvensaun Dili (CCD), Sábadu (17/10/2026).
Iha ninia diskursu, Mariano Assanami Sabino hatoo katak, konferénsia ne’e sai nu’udar momentu atu konsolida polítika, hametin estrutura organizasionál no reafirma kompromisu militante sira nian ba kontinuidade Partidu Demokratiku.
Nia mós subliña katak, partidu tenke mantein ninia identidade no kontinua promove rekonsiliasaun nasionál, diálogu, dezenvolvimentu no unidade nasionál, tuir valór no prinsipiu demokrátiku.
Prezidente PD salienta katak, partidu la’ós de’it organizasaun polítika, maibé mós família ida ne’ebé liga militante sira liuhusi solidariedade, kamaradajen no kompromisu komún. Tanba ne’e, diferensa hanoin no kompetisaun ba lideransa tenke rezolve liuhusi diálogu, debate konstrutivu no respeitu malu.
Nia hateten katak, demokrasia presiza espasu atu membru sira bele hato’o ideia, diskute opiniaun no partisipa iha prosesu desizaun. Maibé, kompetisaun labele sai razaun atu hamosu fahe-malu ka estraga unidade iha estrutura partidu nian.
Mariano mós lembra kona-ba luta no dezafiu ne’ebé militante sira enfrenta durante tinan sira, inklui iha tempu kampaña no situasaun polítika ne’ebé difísil. Esperiénsia sira-ne’e, tuir nia, sai parte husi istória no identidade Partidu Demokratiku, ne’ebé presiza kontinua hametin liuhusi kompromisu no servisu hamutuk.
Nia apela ba militante hotu atu mantein unidade no solidariedade, respeita diferensa no kontinua servisu tuir valór no prinsipiu Repúblika Demokrátika Timor-Leste.
Konferénsia Partidu Demokratiku Munisípiu Dili ba dala IV ne’e hala’o iha kontestu komemorasaun tinan 25 Partidu Demokratiku, ho tema ne’ebé enfatiza unidade, identidade no dalan hamutuk ba futuru.
(jos)
