DÍLI, STLTIMORLESTE.com — Federação Futebol Timor-Leste (FFTL) realiza Kongresu Extraordináriu 2026 ho objetivu atu aprova dokumentu organizasionál no hili komité independente ba períodu 2026–2030.
Kongresu ne’e hala’o iha salaun Hotel Timor, Dili, Sábadu, 17 Outubru 2026, nu’udar parte husi kompromisu FFTL atu garante transparénsia, responsabilizasaun no hametin governasaun organizasionál.
Prezidente FFTL, Nilton Gusmão hateten katak, kongresu ne’e importante atu aprezenta relatóriu no konta sira ba asosiasaun membru, hodi hetan apresiasaun liuhusi votasaun no taka orsamentu tinan 2025.
“Ohin ita halo kongresu extraordináriu ida-ne’e hodi aprezenta konta sira ba asosiasaun sira atu bele hetan apresiasaun liuhusi votus, hodi nune’e ita bele taka ita-nia orsamentu 2025. Kongresu ohin mos lao di’ak tebes ho partisipasaun husi parte hotu,” Nilton Gusmão dehan ba jornalista sira.
Nia esplika katak, kongresu ne’e hala’o iha tempu ne’ebé besik atu remata tinan, maski tuir planu normal, kongresu hanesan ne’e tenke hala’o iha inísiu tinan.
Nia kontinua hateten, katak tempu to’o ona atu FFTL kontinua organiza no hametin koperasaun ho entidade sira, atu bele alkansa objetivu komún no dezenvolve futebol Timor-Leste sai di’ak liután.
Atividade ne’e mós liga ho kompromisu FFTL atu hala’o organizasaun tuir prinsipiu no orientasaun husi Federação Internacional de Futebol (FIFA), Asian Football Confederation (AFC) no ASEAN Football Federation (AFF).
Kongresu ne’e partisipa husi reprezentante asosiasaun membru 14, asosiasaun futebol profisionál lima, no reprezentante klubu kampiaun Primeira Divizaun no Segunda Divizaun.
Asosiasaun no entidade sira ne’ebé partisipa inklui Asosiasaun Futebol Aileu, Ramelau Ainaro, Baucau, Bobonaro, Covalima, Dili Leste, Dili Oeste, Ermera, Lautém, Liquiçá, Manatuto, Manufahi, Oe-Cusse no Viqueque.
Entidade seluk ne’ebé partisipa mak Asosiasaun Árbitru Futebol Timor-Leste, Asosiasaun Futebol Feto Timor-Leste, Federasaun Futsal Timor-Leste, Asosiasaun Treinamentu Futebol Juvenil Timor-Leste no Asosiasaun Treinadór Futebol Timor-Leste.
Aleinde ne’e, klubu AD SLB, kampiaun Primeira Divizaun, no Santo António FC, kampiaun Segunda Divizaun, mós partisipa iha kongresu ne’e.
Liu husi kongresu extraordináriu ne’e, FFTL espera bele hametin prosesu organizasionál, transparénsia no kooperasaun entre entidade membru sira, atu kontinua dezenvolve futebol iha Timor-Leste.
(leo)
