DILI, STLTIMORLESTE.com — Tribunal Judisiáriu Primeira Instánsia Dili (TJPID) aplika Termu Identidade no Rezidénsia (TIR) ba arguidu na’in rua ne’ebé suspeitu envolve iha tentativa transporta ai-kameli ho kuantidade besik 360 kilograma ba Indonézia liuhusi dalan ilegal.
Desizaun ne’e foti husi juís turnu, José Quintão, hafoin hala’o primeiru interrogatóriu ba arguidu na’in rua ho inisiál CST no AEAC, iha TJPID, iha Sábadu (17/10/2026), tuku 14:00 lokraik. Prosesu ne’e rejista ho Númeru Úniku Krime (NUC) 0402/26.PNSIC.
Tuir desizaun tribunál, arguidu na’in rua tenke kumpre obrigasaun aprezenta-an iha instituisaun estadu tuir kondisaun ne’ebé determina iha Termu Identidade no Rezidénsia.
Kazu ne’e hahú iha Kuarta-feira (14/10/2026), bainhira karreta marka Pajero Sport, ho matríkula A.26.210 no kór prateadu, ne’ebé lori ai-kameli, para iha área Erkina, Postu Administrativu Atabae, Suku Aidaba Leten, Aldeia Sulilaran, Munisípiu Bobonaro.
Informasaun kona-ba kronolojia kazu ne’e hatudu katak kareta refere mai husi Munisípiu Lautém no lori ai-kameli ho todan estimadu besik 360 kilograma, ne’ebé transporta atu lori ba Indonézia. Operasaun kaptura ne’e akontese iha tuku 17:45, oras lokál.
Membru Unidade Polísia Marítima hamutuk na’in hitu mak tuir kareta refere to’o iha fatin ne’ebá atu halo kaptura.
Iha tuku 23:30, CST, ne’ebé identifika nu’udar na’in ba ai-kameli, hamutuk ho motorista AEAC, alegadamente tenta fó osan subornu ho montante US$ 1.000 ba membru autoridade sira, ho objetivu atu hetan liberdade ba sasan ne’ebé sira lori.
Maibé, Komandante Kompanhia Vijilánsia Kosteira Norte Atabae no membru sira la simu osan refere, no kazu ne’e kontinua tuir prosedimentu legál ne’ebé vigora iha Timor-Leste.
Primeiru interrogatóriu ne’e prezide husi juís turnu, José Quintão, ho Ministériu Públiku reprezenta husi doutór Domingos Goveia Barreto, no arguidu na’in rua hetan asisténsia legál husi defensór públiku, Anselmo Pinto.
Kazu ne’e sei kontinua tuir prosesu judisiál, no arguidu sira tenke hetan tratamentu tuir lei ne’ebé vigora iha Timor-Leste.
(jos)
