DÍLI, STLTIMORLESTE.com — Ministru Juventude, Desportu, Arte no Cultura, Nélio Isac Sarmento, hamutuk ho Federasaun Silat Timor-Leste no Prezidente CRAM, hala’o sosializasaun Lei Nú. 9/2026, loron 22 fulan Jullu, ne’ebé regula mós kona-ba treinadór iha grupu arte marsiais.
Sosializasaun ne’e foka ba regra katak treinadór sira ne’ebé atu hanorin no loke rangting iha organizasaun grupu arte marsiais tenki iha sertifikadu treinadór molok hahú hala’o sira-nia knaar.
Ministru Nélio Isac Sarmento hateten katak, liuhosi lei foun ne’e, treinadór hotu-hotu tenki tuir formasaun no hetan sertifikadu atu bele hanorin atleta no membru sira iha grupu arte marsiais.
“Se José hakarak sai treinadór, nia tenki tuir formasaun atu hetan sertifikadu. Se la tuir formasaun, Federasaun Silat Timor-Leste no organizasaun rasik labele fó autorizasaun ba nia atu sai treinadór,” ministru hateten ba jornalista sira iha salaun MJDAC, Sional Dili, iha loron 14 fulan Outubru 2026.
Nia esplika katak, regra ne’e importante atu organiza no atualiza dadus rejistu grupu arte marsiais, nune’e mós atu garante katak treinadór sira kumpre rekezitu ne’ebé lei determina.
Ministru ne’e mós fó avizu katak, se membru grupu arte marsiais ruma komete krime, organizasaun ne’ebé tutela nia bele iha responsabilidade tuir lei. Tanba ne’e, organizasaun sira tenki kontrola no garante katak ema ne’ebé hala’o knaar treinadór kumpre rekezitu hotu.
Nia husu organizasaun grupu arte marsiais, Federasaun Silat Timor-Leste no entidade relevante sira atu servisu hamutuk hodi orienta no dezenvolve modalidade ne’e, ho objetivu atu hametin disiplina no prepara atleta sira ba kompetisaun.
Além ne’e, Nélio Isac Sarmento hateten katak Governu iha planu atu prepara modalidade silat atu bele partisipa iha SEA Games 2027, se prosesu organizasaun, preparasaun no kondisaun sira hotu lao di’ak.
“Se ita konsege organiza kondisaun sira ne’e lalais, pelumenus iha SEA Games 2027 ita bele partisipa ona iha modalidade silat. Atleta sira bele mai husi PSHT, Padjajaran ka organizasaun arte marsiais seluk, tuir prosesu seleksaun no rekursu ne’ebé iha,” nia afirma.
Sosializasaun lei ne’e sai hanesan etapa ida atu hametin kumprimentu regra, responsabilidade organizasional no preparasaun atleta silat Timor-Leste ba kompetisaun iha nivel nasionál no internasionál.
(leo)
