DÍLI, STLTIMORLESTE.com — Ekipa basquetebol feto Aileba manán DIT BC ho rezultadu 133–27 iha Liga Basketball Timor-Leste 2026.
Partida ne’e hala’o iha Ginásio Dili, Domingu, 18 Outubru 2026, ne’ebé Aileba hatudu dominasaun durante kuartu haat ho vantajen finál pontu 106.
Iha kuartu dahuluk, Aileba hatudu dominasaun liuhosi atake efetivu no defeza forte, ne’ebé permite ekipa ne’e taka kuartu ho vantajen 42–2.
Tama kuartu daruak, Aileba kontinua kontrola partida, maski DIT BC tenta responde atu hamenus diferensa pontu. Kuartu ne’e remata ho rezultadu 73–13 ba Aileba.
Depois intervalu, Aileba nafatin hatudu dominasaun iha kuartu datoluk, enkuantu DIT BC buka aumenta pontu liuhosi arremesu distánsia dook, inklui pontu tolu.
Maibé, esforsu DIT BC seidauk sufisiente atu hamenus diferensa, tanba Aileba kontinua aumenta vantajen no taka kuartu datoluk ho rezultadu 101–19.
Iha kuartu ikus, Aileba kontinua kontrola ritmu partida no aumenta diferensa pontu, to’o remata jogu ho vitória boot 133–27 kontra DIT BC.
Vitória ne’e hatudu Aileba nia kapasidade ofensiva no defeza forte, ne’ebé sai fatór importante atu asegura rezultadu pozitivu iha kompetisaun ne’e.
Enkuantu ne’e, DIT BC presiza hadi’a organizasaun ofensiva no defeza, atu bele hasoru partida sira tuirmai iha Liga Basketball Timor-Leste 2026.
(leo)
