DILI, STLTIMORLESTE.com – Pasiente diabetes iha Sentru Saúde Vera Cruz lamenta falta aimoruk metformin no reagente teste ran midar, ne’ebé obriga nia sosa aimoruk iha farmásia privadu.
Pasiente Terezinha de Fatima Lay hatete katak, durante fulan Setembru no Outubru 2026, nia ba konsulta iha Sentru Saúde Vera Cruz, maibé la hetan aimoruk diabetes.
Nia esplika katak, iha loron 6 Outubru 2026, nia ba konsulta, maibé simu de’it paracetamol komprimidu lima. Pesoál saúde informa katak metformin laiha, no fó reseita atu sosa aimoruk iha farmásia privadu.
“Hau sente triste tebes tanba aimoruk diabetes laiha iha sentru saúde. Hau simu de’it paracetamol lima, no tenke sosa metformin rasik iha farmásia privadu,” dehan Terezinha ba jornalista, Segunda (19/10/2026), iha Vila Verde.
Nia afirma katak, falta aimoruk ne’e akontese durante fulan rua tutuir malu, Setembru no Outubru. Tanba ne’e, nia tenke uza osan rasik atu sosa aimoruk ne’ebé presiza.
Aleinde falta aimoruk, Terezinha mós relata katak reagente atu halo teste nivel açúkár iha ran la disponivel durante besik fulan lima. Tanba ne’e, nia la konsege halo teste atu kontrola nivel açúkár iha ran.
Nia husu Governu atu rezolve lalais falta aimoruk no reagente teste ran midar, liuliu atu ajuda pasiente vulnerável sira ne’ebé la iha kapasidade finanseira atu sosa aimoruk iha farmásia privadu.
Terezinha konsidera katak pasiente sira ne’ebé depende ba servisu saúde públiku enfrenta difikuldade bainhira aimoruk ne’ebé presiza la disponivel, tanba sira tenke gasta osan rasik atu kontinua tratamentu.
Entretantu, Diretór Armazenamentu INFPM, Boas Alves Bareto hatete katak, instituisaun ne’e distribui ona aimoruk ba Sentru Saúde Vera Cruz atu atende pasiente sira.
Nia esplika katak, iha loron 6 Outubru, INFPM seidauk bele distribui aimoruk tanba ekipa husi PN sei hala’o hela inspesaun iha armazén.
Boas Alves afirma katak, aimoruk agora disponivel ona iha sentru saúde refere atu fasilita atendimentu ba pasiente sira ne’ebé presiza tratamentu.
(dom)
