DÍLI, STLTIMORLESTE.com — Ekipa basquetebol mane husi klubu AD SLB manan Caesar Dante ho rezultadu 59–35 iha kompetisaun Liga Basquetebol Timor-Leste 2026, ne’ebé hala’o iha Ginásio Dili, Domingu, 18 Outubru 2026.
Iha kuartu dahuluk, AD SLB hahú partida ho intensaun aas no konsege marka pontu dahuluk. Maski Caesar Dante koko responde liuhosi atake sira, ekipa ne’e hasoru difikuldade atu ezekuta arremesu ho efetivu.
AD SLB kontinua hatudu servisu ekipa ne’ebé di’ak liuhosi movimentu ofensivu no kolaborasaun entre jogadór sira. Ekipamentu ne’e konsege aumenta pontu no taka kuartu dahuluk ho vantajen 17–4 hasoru Caesar Dante.
Iha kuartu daruak, AD SLB kontinua kontrola ritmu jogu no aproveita frajilidade iha defeza Caesar Dante atu aumenta diferensa pontu. Rezultadu iha finál kuartu daruak mak AD SLB 33–17 Caesar Dante.
Depois deskansu, ekipa rua fila fali ba kampu atu kontinua kompetisaun iha parte daruak. Caesar Dante koko hadi’a nia prestasaun ofensiva no hamenus diferensa pontu, maibé AD SLB kontinua hatudu organizasaun jogu ne’ebé di’ak.
To’o kuartu datoluk, Caesar Dante koko halo kontra-atake atu aumenta pontu, maibé AD SLB nafatin iha vantajen no konsege mantein kontrolu ba partida.
Iha kuartu ikus, Caesar Dante kontinua buka dalan atu hamenus diferensa pontu. Maski nune’e, AD SLB kontinua hatudu konsisténsia iha atake no defeza to’o apitu ikus, hodi taka partida ho rezultadu 59–35.
Vitoria ne’e hatudu prestasaun di’ak husi AD SLB iha Liga Basquetebol Timor-Leste 2026. Enkuantu ne’e, Caesar Dante presiza kontinua hadi’a organizasaun defeza no ezekusaun arremesu atu prepara an ba partida sira tuirmai.
(leo)
