DILI, STLTIMORLESTE.com – Polísia Nasionál Timor-Leste (PNTL) deteta ona suspeitu ho inisiál M, ne’ebé alegadamente envolve iha kazu baku motorista no tuda kareta saneamentu iha Rai Kotu, Tasi Tolu, Domingu kalan.
Komandante PNTL Munisípiu Díli, Komisáriu Asistente Polísia Orlando Gomes hateten katak, kazu ne’e akontese iha oras 00:00, bainhira grupu joven ida tur hela besik Pertamina, Rai Kotu.
Nia esplika katak, grupu joven ne’e hahú tuda kareta ida, antes tuda kareta saneamentu ne’ebé lori fo’er ba fatin soe iha Tibar.
“Grupu ne’e mós baku motorista, no vítima relata kedas akontesimentu ne’e ba Ita nia PNTL iha Dom Aleixo,” hatete Komandante PNTL Munisípiu Díli, Komisáriu Asistente Polísia Orlando Gomes ba jornalista sira iha Eskuarda Dom Alexu Aimutin, Dili, Segunda-feira (19/10/2026).
Nia esplika, depois hetan informasaun, patrulla polísia ba kedas fatin akontesimentu atu halo intervensaun no prevene situasaun ne’e sai grave.
“Vítima aprezenta ona keixa, no ita foti ona deklarasaun vítima nian, inklui deklarasaun husi sasin balun ne’ebé haree akontesimentu,” nia Informa.
Orlando Gomes hateten katak, ekipa investigasaun kontinua halo investigasaun, inklui haree imajen CCTV, atu identifika ema sira ne’ebé envolve iha kazu ne’e.
Nia konfirma katak, polísia hetan ona informasaun kona-ba suspeitu ho inisiál M, no aprezenta ona pedidu mandadu kapturasaun ba autoridade kompetente.
“Ita kontinua hala’o investigasaun atu klarifika faktu sira no determina responsabilidade husi ema sira ne’ebé suspeita envolve iha kazu ne’e,” nia deklara.
Iha fatin ketak, Presidente Autoridade Munisipiu Dili (PAM-Dili) Fransisco dos Santos iha nia Pajina Facebook informa, Funsionariu saneamentu ba servisu kalan hodi halo ambiente ne’ebe mos ba sidadaun hotu-hotu inklui ba Grup deskonfia neebe baku Funsionariu Saniamentu iha Tasi- Tolu,area Rai kotu tuku 12:00 OTL.
“Kuitadu ami nia servisu nee halo ambiente mos para o ho o nia familia goja area saudavel maibe, o tuda hau nia ema sira ne to ran nakfakar, Raikotu tuku 12:00 otl kalan,” nia afirma.
(jen)
