DILI, STLTIMORLESTE.com – Ministru Obras Públikas (MOP), Samuel Marçal garante katak, aldeia sira iha Timor-Leste sei asesu ba rede eletrisidade iha tinan 2027.
Samuel Marçal hateten katak, MOP nia planu dezenvolvimentu ba períodu tinan lima fó prioridade ba estrada, ponte, eletrisidade no bee moos.
“Kona-ba eletrisidade, nível suku konklui ona iha tinan 2025, no iha tinan 2027, aldeia sira bele konklui ona,” Ministru Samuel Marçal ba jornalista sira iha Parlamentu Nasional, Segunda (19/10/2026).
Nia esplika katak, kontratu ba projetu eletrisidade sira asina ona, maibé pakote 30 sei iha faze finál prosesu aprovizionamentu.
Ministru ne’e hein katak prosesu kontratu sira bele konklui iha semana ida ka rua tuirmai, atu nune’e implementasaun projetu bele hahú lalais.
“Hau hein katak iha meadu tinan 2027, aldeia hotu-hotu bele asesu ba rede eletrisidade iha área hotu-hotu,” nia afirma.
Ba uma sira ne’ebé hela iha foho leten no difisil atu liga ba rede eletrisidade, MOP sei buka solusaun liuhusi instalasaun painél solár.
Kona-ba bee moos, Samuel Marçal hateten katak MOP sei fó atensaun ba munisípiu sira ne’ebé iha rekursu bee no kontinua fó prioridade ba área sira iha postu administrativu.
Nia mós informa katak, projetu bee moos iha postu administrativu 19 konklui ona. Maibé, ba área rurál, nia esplika katak asuntu ne’e tama iha kompeténsia Ministériu Administrasaun Estatál (MAE).
Entretantu Orsamentu ba Ministériu Obras Públikas (MOP) ba tinan 2027 mak US$ 251 millaun, iha Proposta Orsamentu Jerál Estadu (OJE) 2027.
Orsamentu ne’e sei fó prioridade ba estrada no ponte, kontinuidade projetu estrada nasionál no manutensaun ponte sira.
Bee-moos no saneamentu: hadi’a no espande asesu ba bee-moos no saneamentu.
Eletrisidade: hasa’e asesu ba eletrisidade iha área rurál.
Infraestrutura estratéjika: apoia preparasaun Timor-Leste ba Prezidénsia ASEAN 2029 no eleisaun sira.
(alb)
