DÍLI, STLTIMORLESTE.com – Kualidade edukasaun iha Timor-Leste presiza mellora liuhusi hadi’a infraestrutura, fasilidade eskola, formasaun profesor no kuríkulu atu responde ba nesesidade dezenvolvimentu nasionál, rejionál no internasionál.
Lia hirak ne’e hato’o husi dosente Universidade Nasionál Timor Lorosa’e (UNTL), Armindo Maia ba STL iha resintu UNTL, Segunda-feira (19/10/2026).
Armindo Maia hatete katak, maski iha parte balun edukasaun lao di’ak ona, maibé sei iha aspetu barak ne’ebé presiza hadi’a, liuliu infraestrutura no fasilidade eskola, livru no materiál didátiku, formasaun profesor no kuríkulu.
“Edukasaun iha sorin balun lao di’ak, maibé buat barak ita presiza hadi’a, hanesan infraestrutura no fasilidade eskola.
Livru no materiál didátiku importante, formasaun profesor no kuríkulu mós importante,” nia hatete.
Nia esplika katak, governu bele iha ona inisiativa atu hadi’a kuríkulu, maibé presiza asegura katak kuríkulu ne’e responde duni ba nesesidade dezenvolvimentu nasaun nian.
“Ita agora sai membru ASEAN, entaun kurikulum tenke adekuadu liu-liu Kona ba numeru graduadu sira neebe remata estudu iha Ensinu sekundariu no Universitariu, maibe hasoru difikulta atu hetan servisu.
Aleinde ne’e, Armindo Maia husu atu iha avaliasaun ba sistema edukasaun, liuliu kona-ba númeru graduadu sira ne’ebé remata estudu iha ensinu sekundáriu no universidade, maibé hasoru difikuldade atu hetan servisu.
Nia konsidera katak, situasaun ne’e presiza analiza didi’ak atu hatene se problema ne’e akontese tanba falta oportunidade empregu iha merkadu servisu ka tanba koñesimentu no kapasidade ne’ebé graduadu sira hetan durante estudu seidauk tuir nesesidade empregadór sira.
Tanba ne’e, nia subliña katak, polítika edukasaun presiza konsidera uluk nesesidade merkadu servisu, atu asegura katak matéria no kompeténsia ne’ebé estudante sira aprende bele ajuda sira hetan oportunidade empregu no kontribui ba dezenvolvimentu nasaun nian.
Iha parte seluk, Armindo Maia mós enfatiza katak, governu presiza kria kondisaun di’ak ba profesor sira atu hala’o sira-nia knaar ho responsabilidade no profisionalizmu.
Nia hateten katak, bainhira profesor sira la hetan kondisaun servisu ne’ebé adekuadu, situasaun ne’e bele afeta sira-nia motivasaun no prosesu hanorin iha eskola.
Tanba ne’e, nia husu atu hadi’a kondisaun servisu profesor sira-nian, inklui hadi’a saláriu no asegura ambiente eskola ne’ebé apropriadu, atu profesor sira bele hala’o prosesu hanorin ho seguru no efetivu.
(joa)
