BAGUIA, STLTIMORLESTE.com – Eskola Sekundária Jerál (ESJ) Públiku Filial Baguia remata Ezame Nasionál ba estudante finalista 72, no kontinua ho Ezame Lokál.
Ezame Nasionál ne’e hala’o durante loron haat, husi 19 to’o 22 Outubru 2026, enkuantu Ezame Lokál sei remata iha Segunda-feira (26/10/2026).
Koordenadór ESJ Públiku Filial Baguia, Guido Mendonça, hato’o informasaun ne’e ba STL iha Baguia, kinta (22/10/2026).
Nia esplika katak, husi estudante finalista 72, kompostu 37 mai husi programa Siénsia no Teknolojia (CT), no 35 seluk husi programa Siénsia Sosiál no Umanidades (CSH).
“Ezame ne’e sai etapa importante ba estudante finalista sira atu hatudu koñesimentu, kapasidade no kompeténsia ne’ebé sira hetan durante tinan tolu nia laran,” nia dehan.
Guido hatutan katak, durante prosesu Ezame Nasionál, inspetór eskolar sira halo akompañamentu no observasaun direta atu asegura ezame la’o ho diak no tuir prosedimentu.
Nia afirma katak, diresaun eskola hamutuk ho konsellu profesór kontinua fó apoiu no orientasaun ba estudante finalista sira durante prosesu Ezame Lokál.
Apoiu ne’e ho objetivu atu asegura ezame hala’o ho orden, responsabilidade no tuir prosedimentu ne’ebé Ministériu Edukasaun determina.
Iha parte seluk, Diresaun Edukasaun Munisipál Baucau, liuhusi Servisu Inspesaun Edukasaun Munisipál, halo ona rekollamentu no transporta rezultadu Ezame Nasionál husi Baguia ba Baucau.
Prosesu ne’e lidera husi Superintendente Edukasaun Munisipál Baucau hamutuk ho inspetór eskolar sira, iha kinta (22/10/2026).
Ekipa responsável sei kontinua transporta rezultadu ezame sira ba Díli, atu entrega ba entidade kompetente hodi halo prosesamentu tuirmai, tuir prosedimentu autoridade edukasaun nian.
Guido reafirma katak, ESJ Públiku Filial Baguia kontinua komprometidu atu promove edukasaun ho kualidade, hametin disiplina no responsabilidade entre estudante sira.
Eskola mós kontinua prepara estudante sira atu sai jerasaun ho koñesimentu, karakter no kapasidade, hodi kontribui ba dezenvolvimentu nasaun.
(tom)
