LAUTÉM, STLTIMORLESTE.com – Primeiru Ministru (PM), Kay Rala Xanana Gusmão afirma katak, Festival Fronteira 2026 iha Suku Com, Munisípiu Lautém, iha signifikadu boot ba hametin rekonsiliasaun, kooperasaun no relasaun família entre Timor-Leste, Nusa Tenggara Timur (NTT) no Provínsia Maluku Barat Daya, Indonézia.
Xanana hateten katak, liuhusi eventu ne’e, povu sira tenke kontinua ko’alia kona-ba istória, tradisaun no hun-abut komún, atu jerasaun foin-sa’e sira la haluha identidade no ligasaun istórika ne’ebé liga povu sira iha illa Timor no rejiaun sira seluk.
“Agora ne’e iha problema teknolojia ne’ebé halo ita haluha hun no abut. Ita bele uza buat foun, maibé ita hotu sente sala se ita haluha ita nia hun no abut. Tanba ne’e, obrigadu ba maluk sira husi NTT no Maluku ne’ebé mai hamutuk ho ita,” Xanana dehan iha nia diskursu iha eventu festival fronteira, Sesta (23/10/2026).
Nia esplika katak, maski povu sira hela iha territóriu no nasaun diferente, relasaun família no istória komún kontinua liga sira liu liu ba família sira iha fronteira entre Timor-Leste, Kupang no Maluku.
Xanana mós temi katak konflitu internasionál, inklui funu iha Ukraina, iha konsekuénsia ba ekonomia mundiál no bele afeta rekursu finanseiru ne’ebé presiza atu responde ba nesesidade hanesan edukasaun no saúde.
Tanba ne’e, nia konsidera Festival Fronteira nu’udar plataforma ida atu hatudu ba mundu katak Timor-Leste no Indonézia bele servisu hamutuk, komprende malu no hametin kooperasaun, la’ós de’it entre governu ho governu, maibé mós entre povu ho povu.
“Festival Fronteira ne’e ki’ik, maibé iha signifikadu boot loos. Liuhusi atividade ne’e, ita hatudu ba mundu katak ita servisu hamutuk, komprende malu no kordena malu atu hametin kooperasaun ba futuru,” nia afirma.
PM Xanana subliña katak, jerasaun katuas sira iha responsabilidade atu prepara kondisaun di’ak ba jerasaun foin-sa’e, atu sira bele komprende istória, valor dame no rekonsiliasaun ne’ebé mak importante ba futuru.
Nia mós fó boas-vindas ba delegasaun sira husi NTT no Maluku Barat Daya, no husu atu parte hotu kontinua hatudu ba mundu katak, maski Timor-Leste nasaun ki’ik, nia iha kompromisu boot atu promove dame, amizade no rekonsiliasaun.
“Ha’u, hanesan xefe Governu, lori responsabilidade boot iha ha’u nia kabas. Ha’u apresia ho fuan tanba maluk sira prepara tempu atu mai iha ne’e. Mai la’ós hanesan turista, maibé hanesan maun-alin,” Xanana dehan.
Nia hatutan katak, serimónia ne’ebé hala’o iha Suku Com ne’e hato’o mensajen importante ba mundu kona-ba kompromisu Timor-Leste atu hametin dame no rekonsiliasaun, maski nasaun ne’e ki’ik.
Xanana afirma katak, diálogu no hasoru malu hanesan ne’e tenke sai oportunidade atu prepara futuru ne’ebé di’ak liu ba jerasaun foin-sa’e, liuhusi rezultadu konkretu husi kooperasaun entre povu sira.
Iha remata nia diskursu, PM Xanana deklara katak nia sente onradu tanba loke eventu importante ne’e iha Suku Com. Tanba ne’e nia mós konvida labarik sira partisipa iha serimónia abertura Festival Fronteira 2026.
Planeia Festival Fronteira 2027 iha NTT
PM Xanana mós hateten katak iha possibilidade atu Festival Fronteira tinan oin realiza iha Kupang, Nusa Tenggara Timur (NTT), Indonézia, nu’udar kontinuidade husi esforsu hametin relasaun, interkámbiu kulturál no rekonsiliasaun entre povu sira iha rai rua ne’e.
Entertantu festival fronteira 2026 ne’ebé realiza iha Suku Com Postu Lautém ne’e hetan partisipasaun husi delegasaun sira husi NTT no Provinsia Maluku Barat Daya kompostu husi Autoridade Sivil no jovem sira inklui komunidade Lokál no Autoridade Munisípal sira iha territóriu Timor-Leste.
(tom)
