DÍLI, STLTIMORLESTE.com – Autoridade Munisipál Dili (AMD) hala’o servisu rekolha lixu durante kalan atu hamenus engrafamentu no fasilita sirkulasaun tráfiku iha kapitál.
Prezidente Autoridade Munisipál Dili, Francisco dos Santos iinforma katak, servisu rekolha lixu hahú tuku 18:00 lokraik to’o tuku 07:00 dader, enkuantu oráriu soe lixu hahú tuku 18:00 to’o 06:00 dader.
“Tanba kontentór limitadu, rekolha lixu durante loron bele kria engrafamentu. Nune’e, ami estabelese oráriu servisu atu hamenus problema tráfiku,” nia hatete.
Francisco dos Santos hato’o deklarasaun ne’e ba jornalista STL iha nia fatin servisu, Autoridade Munisipál Dili, Kaikoli, sexta-feira (23/10/2026).
Nia esplika katak, servisu rekolha lixu durante kalan sei ajuda asegura ambiente moos ba komunidade bainhira hahú atividade iha dader.
Maski nune’e, nia lamenta komunidade balun seidauk kumpre oráriu soe lixu ne’ebé autoridade determina, situasaun ne’ebé kontinua sai dezafiu ba servisu saneamentu.
Francisco mós revela katak traballadór saneamentu balun hetan kanek durante hala’o servisu, maibé sira kontinua kumpre responsabilidade atu mantein sidade moos.
Nia enkoraja traballadór saneamentu sira atu kontinua servisu ho dedikasaun no responsabilidade, maski hasoru difikuldade, tanba sira-nia knaar importante ba saúde públika.
Iha fatin ketak, sidadaun Maria Banca dos Santos husu autoridade atu hala’o rekolha lixu sedu liután, hodi evita risku asidente hanesan ne’ebé akontese iha Tasi-Tolu.
Maria dehan katak, servisu rekolha lixu durante kalan presiza atensaun ba seguransa traballadór sira, liuliu depoisde kazu agresaun hasoru traballadór saneamentu.
“Servisu rekolha lixu todan tebes, maibé ema deskonesidu baku fali traballadór sira. Sira mak halo sidade Dili sai moos,” nia afirma.
Nia konsidera katak, traballadór saneamentu sira merese respeitu no protesaun, tanba sira fó kontribuisaun importante atu mantein limpeza no saúde ambiente iha kapitál.
(jen)
