DÍLI, STLTIMORLESTE.com – Hospital Nasional Guido Valadares (HNGV) hatama reseita US$ 416.000 durante Janeiru to’o Setembru 2026, husi servisu saúde no aluguer fatin.
Diretora Administrasaun, Finansas, Logístika no Aprovisionamentu HNGV, Silvina Izina A. Ximenes Belo hatete, reseita ne’e inklui pagamentu ba servisu VIP, medical check-up, atestadu médiku, aluguer fatin ATM, kafetaria no estájiu ba estudante universitáriu.
Ximenes Belo esplika katak, pasiente estranjeiru sira selu tratamentu tuir item ne’ebé uza, inklui rejistu, aimoruk no análize ran, ho folin tuir kada servisu.
HNGV iha planu atu revee folin tratamentu ba pasiente estranjeiru, maibé sei haree uluk kondisaun no fasilidade iha unidade VIP molok foti desizaun.
“Ita hakarak hasae kustu, ita mos tenke prepara fasilidade ne’ebé bazeia ba kustu ne’ebé atu implementa,” dehan Ximenes Belo ba jornalista sira iha HNGV, Bidau, Sesta (23/10/2026).
Nia hatete katak, HNGV planeia atu halo reabilitasaun no manutensaun ba área VIP iha tinan oin. Depois servisu hirak ne’e remata, instituisaun sei avalia hamutuk atu deside aumentu ka redusaun kustu.
Tuir nia, prosesu atu determina folin ba servisu ka fasilidade ruma la’ós buat ne’ebé fasil, tanba presiza hetan aprovasaun tuir regra no prosedimentu ne’ebé vigora.
HNGV sei aprezenta fali folin foun ba pasiente estranjeiru sira ne’ebé tama no uza fasilidade VIP, depois prepara no hadi’a ona fasilidade hirak ne’e.
(dom)
