LAUTÉM, STLTIMORLESTE.com – Sentru Turizmu Komunitária Ete Hasa Lepek ne’ebé Governu konstrui iha tinan 2022 iha Suku Com, Postu Administrativu Lautém, to’o ohin loron seidauk fó benefísiu ba komunidade tanba falta eletrisidade no asesu estrada ne’ebé seidauk dezenvolve.
Xefe Suku Com, Sergio J. Cristovao, esplika katak sentru turizmu ne’e iha unidade uma tolu, kada uma kompleta ho kuartu no fasilidade sanitária, atu fasilita vizitante sira ne’ebé mai vizita fatin turístiku refere. Maibé, tanba limitasaun infraestrutura, sentru ne’e hela taka temporariamente.
“Uma ne’ebé sira konstrui iha ne’ebá uma tolu, kada uma iha kuartu ida no fasilidade sanitária iha laran, maibé falta eletrisidade no estrada ba ne’eba kondisaun aat,” Sergio J. Cristovao dehan ba jornalista sira iha Com, Sesta (23/10/2026).
Nia hateten katak sentru ne’e entrega ona ba autoridade lokál, maibé to’o agora Suku Com seidauk iha kapasidade finanseira atu halo jestaun no kompleta nesesidade infraestrutura sira ne’ebé falta.
“Sentru ne’e entrega hela ba autoridade, maibé autoridade suku laiha kbiit atu halo, tanba osan ne’e mai husi ne’ebé atu halo?” nia husu.
Sergio haktuir katak sentru turizmu ne’e iha ligasaun ho istória luta libertasaun Timor-Leste, nune’e nia konsidera importante atu hetan atensaun husi instituisaun kompetente, atu bele sai fatin ne’ebé atrai vizitante no fó benefísiu ba ekonomia komunidade.
Nia hateten tan katak, infraestrutura estrada no eletrisidade ba sentru turizmu ne’e seidauk kompletu, maski proposta ba dezenvolvimentu refere submete ona ba entidade kompetente. Maibé, to’o agora seidauk hetan resposta.
Tuir Sergio, estrada husi Lautém ba Com ho distánsia besik 20Km no husi Com ba Trisula ho distánsia 15Km hala’o ona tuir padraun ne’ebé iha, inklui asesu eletrisidade iha área sira refere.
Maibé, estrada husi Com ba Sentru Turizmu Komunitária Eteasa Letiku ho distánsia besik 5Km no eletrisidade ba sentru ne’e seidauk dezenvolve.
“Sentru ne’e ami buka hela maneira atu maneja, maibé ami-nia kapasidade la to’o. Tanba falta eletrisidade no kondisaun estrada, sentru ne’e taka provizoriamente,” nia dehan.
Iha parte seluk, Sergio mós esplika katak, komunidade iha Suku Com kontinua enfrenta dezafiu kona-ba asesu bee moos. Iha aldeia tolu, bee moos lao di’ak tanba bee husi área aas bele dada mai área kraik. Maibé, uma-kain na’in 80 resin seidauk hetan asesu bee ne’ebé adekuadu tanba sistema ne’ebé uza depende ba bomba.
Nia rekonhese katak, Suku Com simu orsamentu kada tinan liuhusi Programa Nasionál Dezenvolvimentu Suku (PNDS), maibé orsamentu ne’e tenke responde mós ba nesesidade prioridade sira seluk iha komunidade, nune’e autoridade suku la iha kapasidade atu kompleta infraestrutura iha sentru turizmu refere.
Sergio sente triste tanba, tuir nia, konstrusaun sentru ne’e uza orsamentu públiku, maibé to’o agora seidauk bele fó rezultadu ba komunidade no nasaun.
Nia aproveita oportunidade ne’e atu apela ba entidade kompetente sira atu fó atensaun ba dezenvolvimentu Sentru Turizmu Komunitária Eteasa Letiku, liuliu iha área eletrisidade, estrada no jestaun, atu infraestrutura ne’ebé konstrui ona bele uza no fó benefísiu ba komunidade.
“Liuhusi meiu ida ne’e, hau aproveita atu ko’alia para ema bele rona no haree dezenvolvimentu ba turizmu komunitária nian,” Sergio remata.
(tom)
