DÍLI, STLTIMORLESTE.com – CEO STL CORP, Salvador J. Ximenes Soares, agradese Nain Feto no Prezidente José Ramos-Horta tanba sira-nia tulun ba STL no média sira durante krize finanseira.
Salvador hatete katak, STL organiza peregrinasaun ba fatin santu Aitara, Fatubessi no Ariana, atu agradese Nain Feto nia grasa no tulun durante instituisaun ne’e enfrenta difikuldade finanseira.
Nia esplika katak, iha períodu difísil ne’e, STL hasoru ameasa taka tanba problema finanseiru. Tanba ne’e, ekipa halo peregrinasaun atu hamulak no husu tulun.
Liu husi peregrinasaun ne’e, ekipa STL hasa’e orasaun ba Nain Feto, atu intersede ba nia Oan, Jesus Kristu, no hato’o pedidu sira ba Maromak iha lalehan.
Salvador dehan katak, depois peregrinasaun, média na’in haat hamutuk ho STL buka apoiu husi Prezidente Repúblika José Ramos-Horta, liuhusi karta kona-ba situasaun média sira iha Timor-Leste.
Nia afirma katak, Prezidente Ramos-Horta buka apoiu husi nia kolega iha Estadu Unidu no Europa, inklui George Soros Foundation, atu konsidera proposta apoiu ba média na’in haat.
Tuir Salvador, fundasaun ne’e simu proposta sira, maibé la konsege fó apoiu finanseiru tomak tuir montante ne’ebé média sira husu.
Tanba ne’e, fundasaun ne’ebé relasiona ho Prezidente Repúblika ajuda kompleta parte osan ne’ebé falta, atu responde ba nesesidade média sira nian.
Salvador konsidera apoiu ne’e hanesan resposta ba orasaun no esforsu ne’ebé ekipa halo atu buka dalan hodi mantein média sira nia funsionamentu.
“Ita fiar katak Maromak rona ita-nia orasaun. Ami agradese Prezidente Repúblika no Primeiru-Ministru tanba sira-nia esforsu atu ajuda Timor-Leste,” dehan Salvador.
Nia mós apela ba Prezidente José Ramos-Horta no Primeiru-Ministru Kay Rala Xanana Gusmão atu kontinua servisu hamutuk hodi lidera nasaun ne’e durante períodu tranzisaun, no garante povu nia moris iha dame.
Salvador hatutan katak, objetivu peregrinasaun nian mak atu kontinua agradese Nain Feto nia tulun, no husu nia intersesaun ba Jesus Kristu atu STL bele ultrapasa difikuldade sira.
Peregrinasaun ne’e hala’o iha fatin santu sira, inklui Aitara, Fatubessi, Ariana, Waidua, Venilale, Baucau no Kinta, iha loron 22 Outubru 2026.
(dom)
