DILI, STLTIMORLESTE.com – Xefe Estadu-Maior Jenerál FALINTIL-Forsa Defeza Timor-Leste (F-FDTL), Tenente-Jenerál Domingos Raúl “Falur Rate Laek”, hala’o semináriu nasionalizmu no patriotizmu ba estudante Dili Institute of Technology (DIT).
Semináriu ne’e hala’o iha Universidade DIT, Manleuana, Dili, iha loron kinta (22/10/2026), tuir komunikadu imprensa F-FDTL ne’ebé STL asesu.
Atividade ne’e ho objetivu atu hametin espíritu nasionalizmu, patriotizmu no responsabilidade estudante sira-nian nu’udar jerasaun foun ne’ebé sei kontinua dezenvolvimentu nasaun.
Semináriu ne’e lori tema “Nasionalismo no Patriotismo nu’udar Pilar ba Jerasaun Kontinuadór ne’ebé Responsável no Dezenvolvimentu Nasionál Timor-Leste ne’ebé Sustentável no Inkluzivu”.
Liu husi semináriu ne’e, estudante sira hetan oportunidade atu aprofunda koñesimentu kona-ba importánsia nasionalizmu, patriotizmu no responsabilidade sidadaun nian ba futuru Timor-Leste.
Valor nasionalizmu no patriotizmu konsidera importante atu hametin unidade nasionál, defende soberania Estadu no kontribui ba dezenvolvimentu sustentável no inkluzivu iha Timor-Leste.
Partisipasaun Tenente-Jenerál Falur Rate Laek iha atividade ne’e mós sai oportunidade ba estudante sira atu komprende responsabilidade jerasaun foun nian iha prosesu dezenvolvimentu nasionál.
Liu husi atividade ne’e, espera katak estudante sira bele dezenvolve kompromisu, responsabilidade no espíritu patriotizmu atu kontribui ba progresu no futuru nasaun.
(jen)
