DÍLI, STLTIMORLESTE.com — Ekipa voleibol feto AD SLB manan Choque ho rezultadu 3–0, iha kompetisaun Liga Nasionál Voleibol Timor-Leste 1ª Devizaun epoka 2026 nebe halao Segunda-feira, 26 Outubru 2026, iha Ginásio Desportu Díli.
Iha jogu ne’e, ekipa rua hatudu kapasidade téknika ne’ebé di’ak, liuhusi smes, passing, servis no bloku. Jogador sira husi ekipa rua luta maka’as atu buka pontu no buka oportunidade atu manan kada set.
Iha set dahuluk, AD SLB domina jogu no manan Choque ho pontu 25–15. Choque buka dalan atu hamenus distánsia pontu, maibé AD SLB kontinua mantein nia vantajen to’o set remata.
Iha set daruak, Choque koko hadia nia jogu no luta atu hasoru presaun AD SLB. Maski Choque hatudu rezisténsia, AD SLB kontinua forte no manan set ne’e ho pontu 25–23.
Iha set datoluk, Choque hahú ho intensaun atu muda rezultadu, maibé AD SLB kontinua kontrola jogu. Ikusmai, AD SLB manan set datoluk ho pontu 25–19, no taka jogu ho rezultadu global 3–0.
Jogu ne’e hetan atensaun tanba Primeiro Ministru Xanana Gusmão, marka prezensa hodi asiste no akompaña kompetisaun to’o remata.
Iha parte seluk, apoiantes no simpatizantes husi ekipa rua kontinua fó apoiu ba sira-nia jogador. Bainhira jogador sira hetan pontu, apoiantes hakilar no fó motivasaun atu sira kontinua luta no aumenta pontu.
Vitória ne’e fó oportunidade ba AD SLB atu kontinua hametin nia pozisaun iha kompetisaun, enkuantu Choque presiza halo avaliasaun ba ninia jogu atu bele hadi’a desempenhu iha partida tuirmai.
(leo)
