DÍLI, STLTIMORLESTE.com — Prezidente Repúblika Timor-Leste, José Ramos-Horta, felisita Luiz Inácio Lula da Silva ba nia reeleisaun nu’udar Prezidente Brazil, hodi haforsa amizade bilateral no kompromisu demokrátiku.
Ramos-Horta hato’o parabéns liuhosi mensajen iha loron 27 Outubru 2026, hodi apresia konfiansa ne’ebé povu Brazil fó ba lideransa Lula da Silva.
Prezidente Timor-Leste konsidera rezultadu eleisaun nian nu’udar reflesaun partisipasaun sivika no vontade soberana povu Brazil nian.
Nia mós espresa esperansa katak mandatu foun Lula da Silva sei haforsa instituisaun demokrátika, koezaun sosiál no dezenvolvimentu inkluzivu no sustentável.
“Ha’u hato’o parabéns ba Prezidente Lula da Silva ba nia reeleisaun. Konfiansa povu Brazil nian hatudu vitalidade demokrásia,” deklara Ramos-Horta.
Ramos-Horta subliña katak Timor-Leste no Brazil fahe istória, demokrasia, solidariedade no justisa sosiál, ne’ebé sai baze importante ba relasaun bilateral.
Nia manifesta konfiansa katak lideransa renovada Lula nian sei hametin kooperasaun entre nasaun rua, inklui iha área dame, dezenvolvimentu no multilateralizmu.
Prezidente Timor-Leste remata mensajen ho dezeju di’ak ba Lula da Silva iha ezersísiu responsabilidade prezidensiál, no ba dame no prosperidade povu Brazil nian.
(eme)
