DÍLI, STLTIMORLESTE.com — Osan OJE 2027 ba sosa karau husi Bali, Indonézia, hamosu kestaun kona-ba retornu investimentu ne’e, no benefísiu ne’ebé kriador lokál sei hetan husi programa ne’e.
Ministériu Agrikultura, Peska, Pekuária no Floresta (MAPPF) planeia atu sosa karau husi Bali, hodi apoia dezenvolvimentu setór pekuária iha Timor-Leste.
Importasaun karau bele ajuda responde ba nesesidade merkadu lokál, maibé rezultadu programa ne’e depende ba planeamentu no kapasidade atu aumenta produsaun animal iha rai-laran.
Governu presiza konsidera mós situasaun kriador lokál sira, atu investimentu Estadu nian la limita de’it ba sosa animal husi rai-li’ur, maibé bele hametin produsaun nasionál.
Kontrolu tékniku, kuarentena no kualidade raça karau ne’ebé tama sai aspetu importante, atu proteje saúde animal no evita risku ba karau lokál.
Observadór Ekonomia, José da Silva Soares, konsidera katak planu sosa karau husi Bali bele ajuda responde ba nesesidade merkadu, maibé MAPPF presiza garante efisiénsia iha utilizasaun osan Estadu nian.
“Sosa karau husi Bali bele ajuda responde ba nesesidade merkadu lokál, maibé MAPPF tenke garante efisiénsia no retornu sustentável husi osan Estadu nian,” dehan José da Silva Soares ba STL, iha Akait, Díli, Tersa (27/10/2026).
Nia mós subliña katak, importasaun presiza polítika komplementár atu proteje kriador lokál, no hametin kualidade raça karau iha Timor-Leste.
Iha parte ketak Akademista Universidade da Paz (UNPAZ), Alarico de Oliveira, mós subliña katak importasaun presiza kontrolu tékniku no kuarentena rigorozu atu prevene risku ba saúde animal no karau lokál.
“Atu garante rezultadu di’ak, MAPPF tenke tau atensaun ba saúde animal no kualidade raça ne’ebé tama, atu la fó impaktu negativu ba animal lokál,” dehan Alarico de Oliveira.
Entretantu antes nee Ministru MAPPF, Marcos da Cruz, hatete katak ministériu forma ona ekipa ida, lidera husi Sekretáriu Estadu Pekuária, ne’ebé sei ba Bali iha 21 Novembru atu diskute ho Governu provínsia Bali kona-ba posibilidade sosa karau.
“Ami sei haree hamutuk nesesidade sira, liuliu iha área pekuária. Ami seidauk bele hatete montante osan ne’ebé sei aloka, maibé ami diskute ona ho Governu Bali kona-ba posibilidade atu sosa karau husi ne’ebá,” dehan Marcos da Cruz.
Nia esplika katak, desizaun atu sosa karau sei depende ba konkordánsia entre parte rua, no rezultadu negosiasaun ne’ebé sei hala’o.
(car)
