DÍLI, STLTIMORLESTE.com – Woodside Energy konkorda atu fa’an interese partisipasaun 33,44% iha Greater Sunrise ba TIMOR GAP, ho valor tranzasaun to’o US$200 millaun.
Akordu kompra no fa’an nee halao iha Hotel Timor, Dili, tersa-feira (27/10/2026), maibé sei depende ba aprovasaun governu no entidade reguladora relevante sira.
CEO Woodside, Liz Westcott, dehan tranzasaun ne’e reflete desizaun estratéjika kompañia nian atu jere portfólio no aloka kapital ba oportunidade sira ne’ebé fó valor ba acionista.
Nia hatete katak Greater Sunrise kontinua sai rekursu ho kualidade aas, ne’ebé iha potensiál atu fó benefísiu ekonómiku no hametin seguransa enerjia ba Timor-Leste no rejiaun.
Woodside sei kontinua servisu hamutuk ho TIMOR GAP, Osaka Gas no governu Timor-Leste no Austrália atu asegura tranzisaun ordenada no apoia dezenvolvimentu projetu ne’e.
“Ami komprometidu atu kontinua servisu ho espírito konstrutivu ho TIMOR GAP, Osaka Gas no governu Timor-Leste no Austrália atu asegura tranzisaun ordenada,” Liz Westcott dehan.
Akordu ne’e inklui interese partisipasaun Woodside iha títulu NT/RL2, NT/RL4, JPDA PSC 03-19 no JPDA PSC 03-20, ne’ebé reprezenta hamutuk 33,44% iha Greater Sunrise.
Bainhira tranzasaun kompleta, TIMOR GAP sei kontrola 100% interese partisipasaun iha projetu ne’e, tuir informasaun ne’ebé kompañia sira fó.
Estrutura Pagamentu
Valor tranzasaun US$200 millaun sei selu iha etapa tolu, tuir progresu dezenvolvimentu projetu no kondisaun sira ne’ebé define iha akordu.
Pagamentu dahuluk US$13,71 millaun sei selu bainhira tranzasaun kompleta. Montante US$11,29 millaun sei selu bainhira atinje Desizaun Finál ba Investimentu (FID).
Restu US$175 millaun sei selu iha loron 365 nia laran depois karga gás naturál liquefeitu (LNG) dahuluk ne’ebé produz husi Greater Sunrise fa’an ona.
Akordu ne’e mós konsidera posibilidade Kontratu Partilha Produsaun (PSC) Greater Sunrise foun tama iha vigor antes tranzasaun kompleta, tuir Tratadu Fronteira Marítima entre Timor-Leste no Austrália.
TIMOR GAP Kontrola Projetu
Prezidente no CEO TIMOR GAP, Rui Soares, dehan akizisaun ne’e sai pasu importante ba kompañia nasionál atu aselera dezenvolvimentu Greater Sunrise.
Nia hatete katak kontrolu tomak ba projetu ne’e sei ajuda TIMOR GAP avansa prosesu planeamentu no selesaun konseitu dezenvolvimentu TIMOR LNG, ho objetivu atu lori gás ba kosta sul Timor-Leste.
“Ita agora iha pozisaun forte atu aselera dezenvolvimentu Greater Sunrise no selesaun avansada ba konseitu dezenvolvimentu TIMOR LNG,” Rui Soares dehan.
Nia esplika katak Greater Sunrise iha potensiál atu transforma kosta sul sai sentru industriál no enerjétiku, kria empregu ba Timoroan, dezenvolve negósiu lokál no aumenta atividade ekonómika.
Soares hatete katak asegura interese partisipasaun tomak sai realizasaun importante, maibé TIMOR GAP iha responsabilidade atu transforma akizisaun ne’e ba progresu konkretu.
Nia mós agradese Ministru Petróleu no Rekursu Minerál, Fransisco Monteiro, no ekipa téknika no jurídika sira ne’ebé kontribui ba prosesu negosiasaun no finalizasaun akordu.
Governu Agradese Woodside
Ministru Petróleu no Rekursu Minerál, Fransisco Monteiro, ne’ebé marka prezensa iha serimónia asinatura, konsidera akordu ne’e nu’udar momentu importante ba Timor-Leste.
Nia agradese Woodside tanba servisu tékniku ne’ebé kompañia hala’o durante tinan barak atu konfirma potensiál rekursu Greater Sunrise no avansa preparasaun ba dezenvolvimentu projetu.
Monteiro dehan, transferénsia interese partisipasaun ne’e fó oportunidade ba Timor-Leste, liuhusi TIMOR GAP, atu aselera planeamentu no dezenvolvimentu Greater Sunrise.
Nia hatutan katak kampu ne’e deskobre iha tinan 1974, no agora Timor-Leste avansa atu kontrola interese partisipasaun tomak liuhusi kompañia nasionál.
Lokalizasaun Kampu
Kampu gás no kondensadu Sunrise no Troubadour, ne’ebé koñesidu hamutuk hanesan Greater Sunrise, lokaliza besik 150 quilómetru sudeste husi Timor-Leste no 450 quilómetru noroeste husi Darwin, Austrália.
Kompletamentu tranzasaun sei depende ba aprovasaun governu no entidade relevante sira, inklui kumprimentu kondisaun kontratuál antes akordu bele tama iha vigor.
Iha 2 Setembru 2026, TIMOR GAP anúnsia ona akordu ho Osaka Gas atu sosa interese partisipasaun 10% iha Greater Sunrise, ne’ebé mós depende ba kumprimentu kondisaun sira iha akordu.
Akizisaun sira ne’e reprezenta esforsu Timor-Leste atu aumenta kontrolu ba rekursu gás naturál no avansa dezenvolvimentu Greater Sunrise ba benefísiu ekonomia nasionál.
(dom)
