DILI, STLTIMORLESTE.com – Ministru Edukasaun (ME), Dulce de Jesus Soares hato’o parabéns ba profesór hotu iha Timor-Leste, iha komemorasaun Loron Mundial dos Profesores, no afirma katak sai profesór la’ós servisu fasil, tanba presiza dedikasaun, pasiénsia no responsabilidade boot atu eduka jerasaun foun.
“Mensajen primeiru mak parabéns ba profesór doben sira hotu iha Timor-Leste tomak. Ita-boot sira hatene katak servisu sai profesór la’ós fasil. Sira fó sira-nia vida tomak, pasiénsia, dedikasaun no responsabilidade boot atu eduka oan povu Timor-Leste nian,” dehan ministra Edukasaun, Dulce de Jesus Soares, ba jornalista sira iha salaun Ian Martin, Balide, iha Tersa (27/10/2026).
Ministra ne’e rekoñese katak, iha prosesu servisu, dala ruma Ministériu Edukasaun (ME) bele halo buat balun ne’ebé la tuir profesór sira-nia espetativa. Tanba ne’e, nia husu komprensaun husi profesór sira no hato’o katak Governu hakarak kontinua fó atensaun no apoiu ba sira.
Dulce de Jesus Soares hatutan katak, nia hamutuk ho Sekretáriu Estadu, hakarak hato’o apresiasaun ba profesór sira-nia kontribuisaun iha área edukasaun.
Nia enfatiza katak apoiu ba profesór sira importante tebes atu sira bele hala’o knaar ho di’ak liután, hodi kontribui ba dezenvolvimentu edukasaun no formasaun jerasaun foun iha Timor-Leste.
(jac)
