DÍLI, STLTIMORLESTE.com – Ministériu Edukasaun (ME), liuhusi Unidade Kurríkulu Nasionál, simu ona relatóriu pontus ezame nasionál husi munisípiu balun, maibé munisípiu seluk seidauk haruka relatóriu ne’e.
Koordenadór Gabinete Unidade Kurríkulu Nasionál iha ME, João Mau Pelu, hato’o informasaun ne’e ba jornalista sira iha salaun Ian Martin, Balide, tersa-feira (27/10/2026).
João Mau Pelu hatete katak, iha tinan ne’e, estudante na’in 51.181 partisipa iha ezame nasionál. Maski nune’e, ME sei kontinua halibur informasaun kona-ba estudante sira ne’ebé la tuir ezame, inklui númeru no razaun sira ne’ebé halo estudante sira ne’e la marka prezensa.
“Tinan ne’e ezame nasionál lao ho susesu, estudante na’in 51.181 partisipa iha ezame. Maibé relatóriu husi munisípiu seidauk tama hotu. Ami sei halibur informasaun kona-ba estudante hira mak la tuir ezame no razaun saida, hodi munisípiu sira haruka informasaun mai,” João Mau Pelu dehan.
Nia hatutan katak, hafoin prosesu halibur dadus ne’e, ME sei publika oráriu ba ezame nasionál faze daruak ka segunda xamada, ba estudante sira ne’ebé la konsege tuir ezame nasionál iha faze dahuluk.
Iha parte seluk, João Mau Pelu esplika katak, Unidade Kurríkulu Nasionál simu ona rezultadu resposta husi munisípiu sira. Ekipa téknika halo hela ajustamentu no instala ona makina koreksaun pontus ezame nasionál, atu prepara prosesu koreksaun.
Nia hatete katak, prosesu koreksaun pontus ezame nasionál ne’e sei hala’o durante loron 30, tuir ajenda ne’ebé prepara ona.
“Tuir ajenda, ita sei publika rezultadu ezame iha fulan Dezembru tinan ne’e. Depois estudante sira ne’ebé la tuir ezame iha faze dahuluk mai tuir segunda xamada, ami sei kontinua prosesu koreksaun no halo anúnsiu rezultadu,” nia esplika.
João Mau Pelu mós hatutan katak, estudante balun ne’ebé la tuir ezame nasionál iha faze dahuluk tanba ba servisu ka tuir atividade iha rai-li’ur, bele iha oportunidade atu tuir ezame iha faze daruak, tuir regra no manual ezame nasionál.
(jac)
