BAUCAU, STLTIMORLESTE.com – Motorista transporte públiku rota Laga–Baucau Vila preokupa folin gasolina no óleo kareta ne’ebé aumenta, to’o obriga motorista balu hahú aumenta tarifa pasajeiru maski seidauk iha orientasaun ofisiál klaru.
Reprezentante motorista transporte públiku, Agostinho da Silva Ximenes, hateten katak folin gasolina ne’ebé antes US$ 1,00 kada litru, atual sa’e to’o US$ 1,50 hodi aumenta kustu operasionál ba motorista sira iha Munisípiu Baucau.
“Antes ne’e selu US$ 1,00, maibé agora mina sa’e, selu US$ 1,50 ne’e estandar ona,” Agostinho hateten ba STL iha Vila Nova, Baucau, Tersa-feira (27/10/2026).
Nia esplika katak tarifa pasajeiru antes aplika ba rota Laga–Baucau Vila mak US$ 1,00 kada ema, enkuantu pasajeiru husi Mulia no Seiçal ba Baucau Vila selu US$ 0,75.
Maibé, tuir Agostinho, atual motorista balu hahú aplika tarifa US$ 1,50 ba pasajeiru husi Laga ba Baucau Vila no US$ 1,00 ba pasajeiru husi Mulia no Seiçal ba Baucau Vila.
Agostinho rekoñese katak seidauk iha orientasaun ofisiál klaru kona-ba tarifa foun, maibé Diresaun Munisipál Transporte no Komunikasaun (DMTK) Baucau fó hanoin ba motorista sira atu ajusta tarifa tuir presu kombustível.
“Se ida ne’e mak na’in hira sente la di’ak atu lori ba ne’ebé, ami prontu atu hatán, maibé ida ne’e ami lao tuir de’it presu mina,” nia argumenta.
Aleinde gasolina, motorista sira mós enfrenta aumentu folin óleo no filtru ba kareta. Agostinho hateten katak filtru ida ne’ebé antes folin US$ 3,50, atual sa’e ba US$ 4,50. Óleo kareta marka unacor litru rua ne’ebé antes folin US$ 3,50, atual mós aumenta ba US$ 4,50.
Tanba ne’e nia husu Governu atu konsidera difikuldade ne’ebé motorista no ema ne’ebé hala’o atividade negósiu enfrenta tanba kustu operasionál ne’ebé aumenta.
Iha sorin seluk, pasajeiru Cipriano Ximenes preokupa ho tarifa pasajeiru ne’ebé motorista balu aplika, tanba seidauk hetan informasaun klaru husi entidade kompetente kona-ba mudansa tarifa ne’e.
“Loos, iha kareta balu hau mai husi Laga, hau fó US$ 1,00, depois husu tan US$ 0,50, ne’ebé hau selu hamutuk US$ 1,50,” Cipriano dehan.
Nia husu ba Diresaun Nasionál Transporte Terrestre (DNTT) atu kontrola tarifa transporte públiku no fó esplikasaun klaru kona-ba folin ne’ebé tenke aplika.
“Mina karun duni, maibé hau husu DNTT kontrola kareta sira ne’e. Selu US$ 1,50 ne’e sira mak haruka ka motorista sira mak hakarak kobra hanesan ne’e?” nia husu.
STL tenta konfirma asuntu tarifa pasajeiru ho Diretór DMTK Baucau, Mariano Pinto da Costa, maibé la konsege hetan komentáriu, tanba laiha fatin.
STL mós tenta hetan informasaun adisionál kona-ba aumentu folin óleo no filtru husi ofisina balu, maibé la konsege hetan komentáriu husi na’in ofisina, tanba laiha fatin.
Entretantu, bazeia ba observasaun STL iha postu abastesimentu sira iha Baucau Vila, iha 27 Outubru 2026, folin gasolina varia entre US$ 1,42 no US$ 1,50 kada litru, enkuantu gazoel to’o US$ 1,65 kada litru.
(tom)
