DILI, STLTIMORLESTE.com – Mate-isin Hortencio Auxilio, vítima konflitu joven iha Lautém, remata ona autópsia iha HNGV no entrega ba família, ho akompañamentu BOP.
Xefe Departamentu Forénsik HNGV, Nilton Tilmankonfirma katak, autópsia remata iha Segunda-feira (26/10/2026), no mate-isin entrega kedas ba família no BOP atu fo segurasa.
“Autópsia remata ona, no mate-isin entrega ba família. BOP asegura transladasaun mate-isin ba rezidénsia iha Munisípiu Lautém,” Nilton Tilman hatete ba STL liu husi telefone, Tersa (27/10/2026).
Nia esplika katak, Hortencio Auxilio mate tanba violénsia entre joven sira iha Suku Cotamuto, Postu Administrativu Luro, Munisípiu Lautém.
Antes autópsia hala’o, mate-isin lori ba HNGV no hein dokumentu husi ekipa forénsik Lautém atu kumpre prosedimentu nesesáriu.
“Rezultadu autópsia labele fó sai, tanba tribunál mak sei hatete. Ami hala’o de’it prosesu autópsia,” Nilton Tilman esplika.
Nia mós informa katak, joven na’in tolu seluk ne’ebé envolve iha insidente ne’e hetan kanek no kontinua simu tratamentu intensivu iha ospitál.
Iha parte seluk, fonte husi Batalhaun Ordem Públika (BOP) konfirma katak unidade ne’e akompaña transladasaun mate-isin husi Dili ba Postu Administrativu Luro, Lautém.
“Ita akompaña transladasaun matebian Hortencio Auxilio ba nia rezidénsia, depois autópsia remata iha HNGV,” fonte BOP ne’e hatete.
Durante viajen, ekipa BOP hasoru perturbasaun ki’ik iha Suku Afabubu, maibé konsege hakalma situasaun no mantein seguransa.
Iha operasaun ne’e, ekipa apreende arma kro’at, inklui katana tolu, samurai ida no tudik ida, ne’ebé entrega ona ba PNTL Eskuadra Luro.
BOP informa katak, nia ekipa kontinua mantein seguransa iha rezidénsia vítima nian, no situasaun iha área ne’e to’o informasaun ikus seguru, hakmatek no kontroladu.
(jen)
