DILI, STLTIMORLESTE.com – Ministru Interior, Francisco da Costa Guterres, husu Komandu-Jerál PNTL foti medidas rigorozu hasoru joven sira ne’ebé envolve iha konflitu iha Dili.
Ministru Interior fó orientasaun ne’e iha Palásiu Governu, Kuarta-feira (28/10/2026), hodi responde ba konflitu entre grupu joven sira ne’ebé akontese iha kapitál.
“Ha’u fó ona orientasaun ba Komandu-Jerál PNTL atu foti medidas forte hasoru joven sira ne’ebé halo konflitu iha Dili,” ministru Francisco Guterres afirma.
Nia hateten katak, PNTL sei kontinua hala’o patrullamentu konjuntu ho F-FDTL, no servisu hamutuk ho lider komunitáriu sira atu prevene konflitu no garante estabilidade.
Ministru ne’e mós instrui Polísia Komunitária atu kolabora ho lider komunitáriu no konsellu suku sira, hodi organiza diálogu ho komunidade, liuliu joven sira.
“Tenke halo diálogu ho komunidade, liuliu joven sira, atu muda sira-nia mentalidade no prepara an atu partisipa iha dezenvolvimentu. Baku malu la lori benefísiu,” nia afirma.
Nia esplika katak, diálogu ho komunidade importante atu aumenta konsiénsia joven sira kona-ba dame, prevene violénsia no promove partisipasaun iha dezenvolvimentu nasionál.
Ministru Interior refere katak, Polísia Komunitária kontinua hala’o diálogu ho komunidade iha área Komoro, ne’ebé autoridade sira estabelese ona postu polísia.
“Joven sira ne’ebé la kontrola an, tuur hemu tua no depois hamosu problema, tenke muda hahalok ne’e. Ida-ne’e importante atu mantein estabilidade,” nia dehan.
Iha parte seluk, Komandante PNTL Munisípiu Dili, Komisáriu Asistente Polísia Orlando Gomes, konfirma katak membru PNTL halo ona intervensaun hasoru konflitu ne’ebé akontese iha Komoro.
“PNTL la tolera ema ka grupu sira ne’ebé envolve iha konflitu. Ema ne’ebé envolve sei kaptura no lori ba investigasaun,” Orlando Gomes afirma.
Nia esplika katak, suspeitu sira ne’ebé envolve iha konflitu sei hetan investigasaun, antes autoridade aprezenta kazu ba Ministériu Públiku tuir prosedimentu legál.
PNTL mós apela ba komunidade atu kontinua koopera ho autoridade sira, hodi prevene konflitu, mantein orden públika no garante seguransa iha Sidade Dili.
(jen)
