DÍLI, STLTIMORLESTE.com – Ema kbiit laek no ema ho defisiénsia (EhD) iha vontade atu kontinua edukasaun, maibé limitasaun finanseira no falta apoiu sai obstákulu ba sira.
Xefe Suku Bebonuk, Alfredo da Costa hato’o informasaun ne’e ba STL iha Bebonuk, Kuarta (28/10/2026).
Nia dehan katak, ema kbiit laek no EhD balun iha vontade boot atu kontinua estudu, maibé sira nia kondisaun ekonómika la permite atu selu propina no nesesidade eskola seluk.
Tanba ne’e, komunidade sira-ne’e hato’o sira-nia preokupasaun kona-ba asesu ba edukasaun, no lideransa suku buka dalan atu lori sira-nia nesesidade ne’e ba instituisaun relevante sira.
“Ami-nia kondisaun físika mak iha defisiénsia, maibé ami-nia kapasidade hanoin la iha defisiénsia, ami mós prontu no iha vontade atu kontinua estudu, maski ami-nia kondisaun finanseira la permite. Tanba ne’e, ami husu atu buka dalan hodi ajuda ami,” nia dehan.
Alfredo da Costa esplika katak, nu’udar lideransa komunitária, nia kontinua buka solusaun no halo koordenasaun ho instituisaun edukasaun sira, atu responde ba nesesidade komunidade, maski apoiu ne’e seidauk bele to’o ba ema hotu.
Nia relata katak, durante nia mandatu, nia halo koordenasaun ho direksaun eskola Internasional School no Madre Alma, atu buka oportunidade ba labarik sira husi família kbiit laek atu asesu ba edukasaun.
Tuir nia, liu husi koordenasaun ho Internasional School, estudante na’in neen hetan oportunidade atu kontinua eskola durante nia mandatu.
Eskola ne’e mós hatudu abertura atu simu estudante balun, ho posibilidade atu selu kustu eskola tuir mai.
Nia hatutan katak, maski estudante kbiit laek balun hetan ona oportunidade atu estuda iha eskola, asesu ba ensinu superiór, liuliu ba ema ho defisiénsia iha universidade, sei sai dezafiu ne’ebé presiza atensaun husi instituisaun relevante sira.
Alfredo subliña katak, ema ho defisiénsia iha kapasidade no direitu hanesan ho ema seluk atu hetan edukasaun.
Tanba ne’e, nia apela ba eskola, universidade no komunidade atu fó oportunidade ba ema hotu, la haree ba sira-nia kondisaun físika ka ekonómika.
“Ami bele iha defisiénsia iha tilun, matan ka parte físika, maibé ami-nia matenek la iha defisiénsia. Ami hotu mak kriatura Maromak nian. Tanba ne’e, buka dalan atu ajuda ami no labele halo diskriminasaun hasoru ema ho defisiénsia,” nia enfatiza.
Nia mós husu ba komunidade, liuliu ema ne’ebé la iha defisiénsia, atu agradese ba Maromak tanba hetan saúde no kapasidade físika, no hatudu respeitu ba ema ho defisiénsia, liuhusi fó apoiu no oportunidade atu sira bele asesu ba edukasaun.
Nia hein katak, liuhusi kooperasaun entre lideransa komunitária, instituisaun edukasaun no komunidade, estudante kbiit laek no ema ho defisiénsia bele hetan oportunidade justu atu asesu ba iha Edukasaun.
(joa)
