DÍLI, STLTIMORLESTE.com —Prezidente Republika (PR), José Ramos-Horta anuncia vizita líder internasionál na’in lima sei vizita Timor-Leste iha Novembru, hodi hametin amizade no koperasaun.
Prezidente Repúblika hato’o informasaun ne’e iha diskursu durante serimónia funebre Saudozu Sebastião Gomes, iha Santa Cruz, Díli, Kuarta-feira, 28 Outubru.
Tuir Ramos-Horta, líder internasionál sira sei vizita Timor-Leste atu hametin relasaun amizade no koperasaun entre nasaun sira.
Líder sira ne’ebé espera mai inklui Prínsipe Albert II husi Mónako no Primeiru-Ministru husi Fiji, Papua-Nova Guiné, Vanuatu no Ilhas Salomão. Sira sei partisipa iha selebrasaun Proklamasaun Independénsia, 28 Novembru.
Prezidente mós ko’alia kona-ba pozisaun Timor-Leste iha nivel internasionál, inklui demokrasia no liberdade imprensa, no refere rezultadu relatoriu internasionál sira.
Nia afirma katak, Timor-Leste kontinua hametin nia partisipasaun iha ASEAN, no dezenvolvimentu nasionál hetan apoiu husi juventude no sosiedade sivíl.
“Ekonomia lao dadaun di’ak, konforme dadus internasionál mós rai barak enfrenta krize boot liu ita-nian,” dehan Ramos-Horta.
Nia subliña katak, dame no estabilidade iha sosiedade sai elementu importante ba progresu nasaun nian, no fó valor ba kontribuisaun juventude no sosiedade sivíl.
Prezidente mós hato’o apresiasaun ba Governu sira ne’ebé kontribui ba dezenvolvimentu Timor-Leste durante tinan sira, no fó omenajen ba veteranu no mártir rezisténsia.
Nia lembra joven klandestina sira ne’ebé partisipa iha luta no diplomásia, hodi lori informasaun kona-ba situasaun Timor-Leste ba Indonézia no komunidade internasionál.
Ramos-Horta mós fó omenajen ba Sebastião Gomes no mártir sira seluk, inklui Nicolau Lobato, membru Komité Sentral, FALINTIL no lideransa relijioza sira ne’ebé kontribui ba istória nasaun.
Nia destaka Igreja nia kontribuisaun ba komunidade, estabilidade no dame iha Timor-Leste, no lembra lider relijiozu sira ne’ebé partisipa iha istória luta no rekonsiliasaun nasionál.
Prezidente afirma katak sakrifísiu jerasaun uluk tenke nafatin hetan rekoñesimentu, no jerasaun foun tenke kontinua promove dame, unidade no dezenvolvimentu nasionál.
Tuir informasaun ofisiál, vizitante sira inklui Prínsipe Albert II husi Mónako no Primeiru-Ministru haat husi Fiji, Papua-Nova Guiné, Vanuatu no Ilhas Salomão. Sira sei partisipa iha selebrasaun aniversáriu 51 Proklamasaun Independénsia Timor-Leste, iha 28 Novembru.
Prínsipe Albert II, Mónako Prínsipe Albert II, moris iha 14 Marsu 1958, mak soberanu Mónako nian. Nia sai soberanu iha 2005, depois nia aman, Prínsipe Rainier III, mate.
Nunee mos Sitiveni Rabuka, mak Primeiru-Ministru Fiji nian. Nia hetan eleisaun ba kargu ne’e iha Dezembru 2022, depois uluk ona lidera Governu Fiji entre 1992 no 1999.
James Marape, Papua-Nova Guiné, mak Primeiru-Ministru Papua-Nova Guiné nian, nasaun ida ne’ebé iha relasaun rejionál importante ho Timor-Leste. Marape lidera Governu Papua-Nova Guiné desde 2019, no nia kontinua ocupa kargu ne’e iha 2026.
Jotham Napat, Vanuatu mak Primeiru-Ministru Vanuatu nian no reprezentante Tanna Constituency iha Parlamentu Vanuatu. Nia hetan eleisaun ba Primeiru-Ministru iha 2025. Napat iha esperiénsia iha administrasaun públika no servisu governu, inklui knaar anterior hanesan Ministru Infraestrutura no Utilidade Públika.
Matthew Wale, Ilhas Salomão mak Primeiru-Ministru Ilhas Salomão nian, ne’ebé Parlamentu hili iha 15 Maiu 2026. Nia reprezenta Aoke/Langalanga Constituency iha Parlamentu desde 2008. Wale iha esperiénsia iha polítika no edukasaun.
(eme)
