BAUCAU, STLTIMORLESTE.com – Xefe Estadu-Maior Jenerál F-FDTL Tenente Jeneral Domingos Raul “Falur Rate Laek” Reprezentante Koronél Tirocinado Mário Baptista “Bersama”, ensera ezersísiu Treinu Kombinasaun Arma (TCA) 26.1, iha baze Komponente Terrestre Baucau.
Liu husi Komunikadu Impresa ne’ebe STL asesu liu husi Media F-FDTL) katak ezersísiu ne’e hala’o durante loron 10, ho partisipasaun husi Komponente Terrestre, Komponente Naval, Komponente Aérea, Unidade Polícia Militar no Unidade FALINTIL.
Nia dehan, durante serimónia enseramentu, Koronél Bersama subliña katak partisipante sira tenke aplika koñesimentu no abilidade ne’ebé hetan iha ezersísiu ba formasaun iha komponente no unidade ida-idak.
“Ezersísiu ne’e sai pasu importante atu dezenvolve formasaun koletiva no, liuliu, formasaun konjunta,” hatete Koronél Tirocinado Mário Baptista “Bersama”, ba jornalista sira iha Baucau,loron (29/10/2026).
Nia mós hato’o katak ambiente operasionál kontinua muda lalais, nune’e militár sira presiza komprende téknika, tátika no ekipamentu foun atu responde ba dezafiu iha kampu operasionál.
Koronél Bersama enfatiza katak preparasaun téknika, fízika no morál kombatente ida-idak importante atu hasa’e kapasidade no prontidaun unidade sira-nian.
Nia esplika katak kombatente ida labele enfrenta ameasa hotu mesak, tanba koñesimentu, kooperasaun no apoiu malu sai elementu importante atu supera difikuldade.
Tuir nia, ezersísiu kombinasaun arma ne’e mós objetivu atu identifika aspetu ne’ebé presiza hadi’a no hasai lisaun ba preparasaun operasionál iha futuru.
Entertatu rezultadu husi ezersísiu ne’e sei integra iha prosesu formasaun individuál no koletiva, atu kontribui ba prontidaun F-FDTL iha kumprimentu knaar defeza nasionál nian.
(jen)
