DÍLI, STLTIMORLESTE.com — Obra estrada foun iha Bairru Pite, Dili, seidauk to’o tinan ida maibé kuak boot rua mosu ona iha klaran dalan, hodi hamosu risku ba motorista sira.
Tuir imajen ne’ebé foti iha terrenu, kuak rua ne’e nakonu ho bee, ne’ebé bele difikulta motorista sira atu haree kle’an kuak bainhira liu iha área ne’e, liuliu durante udan.
Estrada ne’e sai dalan importante ba komunidade no transporte públiku atu asesu ba sentru sidade. Nune’e, estragu iha dalan bele afeta seguransa no movimentu transporte loroloron.
Obra ne’ebé kuak iha tempu badak hamosu dúvida, kona-ba durabilidade no kontrolu kualidade durante konstrusaun.
To’o agora, seidauk iha esplikasaun ofisiál, husi Ministériu Obras Públikas kona-ba kauza estragu ne’e.
Motorista Antonio Soares hateten katak estrada ne’e kuak ona maski foin halo, no kondisaun ne’e aumenta risku ba motorista sira ne’ebé uza dalan ne’e loroloron.
“Maski estrada ne’e foin halo, kuak boot rua mosu ona. Kondisaun ne’e obriga ami motorista sira atu kuidadu tebes bainhira liu iha dalan ne’e,” dehan Antonio ba STL, iha Bairru Pite, Dili, Sesta (30/10/2026).
Antonio husu ba kompañia ne’ebé halo obra no Ministériu Obras Públikas, atu responsabiliza-an no hadi’a estrada ne’e lalais.
Entretantu, Observadór Polítika, Samuel de Oliveira, konsidera katak kazu ne’e hatudu nesesidade, atu hametin supervizaun no fiskalizasaun obra públika.
“Estrada foin halo la to’o tinan ida kuak fali ona. Ne’e hamosu dúvida kona-ba supervizaun no fiskalizasaun ba obra públika,” dehan Samuel.
Nia husu ba Governu, atu aplika sansaun ba kompañia ne’ebé la kumpre padraun kualidade no hadi’a prosesu tenderizasaun, atu asegura katak projetu infraestrutura entrega ba kompañia kompetente.
(car)
