DILI, STLTIMORLESTE.com — Primeiru-Ministru (PM), Kay Rala Xanana Gusmão simu informasaun kona-ba konfrontu iha Beto, Suku Madohi, Dili, ne’ebé autoridade atribui ba Grupu Arte Marsiais (GAM).
Xanana hato’o informasaun ne’e ba jornalista sira, hafoin enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairro Pité, Kinta-feira (29/10/2026).
Primeiru-Ministru hatete katak Ministru Interiór mak fó informasaun kona-ba konfrontu entre grupu joven sira iha Beto, ne’ebé rezulta estragu ba uma no loja sira iha área ne’e.
“Ministru Interiór mak informa katak iha Beto grupu sira baku malu no estraga sasán,” dehan Xanana.
Xanana mós informa katak, Konsellu Ministrus halo ona apelu ba administradór postu administrativu, xefe suku no xefe aldeia atu foti medida hodi prevene violénsia no evita konflitu hanesan ne’e akontese fila-fali.
Nia subliña katak, autoridade lokál sira iha responsabilidade atu ajuda mantein dame no rezolve problema iha komunidade.
Tuir informasaun Polísia Nasionál Timor-Leste (PNTL), liuhusi Komandu Munisípiu Dili, polísia detein suspeitu na’in-haat ne’ebé alegadamente envolve iha konfrontu iha Beto.
Insidente ne’e akontese iha Segunda-feira (26/10/2026), maizumenus tuku 18:00, iha Suku Madohi, Postu Administrativu Dom Aleixo, Munisípiu Dili.
Konfrontu ne’e envolve joven sira ne’ebé tuda malu, hodi rezulta estragu ba uma no loja balun iha área estrada nian. Autoridade sira seidauk klarifika iha informasaun ne’e kona-ba estragu nia totál.
Alende nee Xanana mós ko’alia kona-ba asuntu setór petróleu no rekursu naturál, inklui prosesu pagamentu ba projetu relevante sira. Nia refere katak Ministru Petróleu no Rekursu Naturál sei fó informasaun adisionál ba Prezidente Repúblika.
Xanana mós temi preparasaun planu no projetu sira, inklui planu ne’ebé sei presiza esplika kle’an liután hosi ministériu relevante. Maibé, detallu kona-ba projetu, prazu no montante finanseiru seidauk klaru iha informasaun ne’ebé disponivel.
(eme)
