DILI, STLTIMORLESTE.com — Primeiru-Ministru (PM), Kay Rala Xanana Gusmão husu sidadaun hotu, liuliu joven sira atu hametin dame, unidade no respeitu ba matebian hodi promove dezenvolvimentu Timor-Leste.
Xanana hato’o apelu ne’e ba jornalista sira, hafoin enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairo Pité, Kinta-feira (29/10/2026).
Xanana dehan katak, Loron Finadu sai tempu atu reza no hanoin fila-fali kontribuisaun matebian sira nian, no enkoraja sidadaun atu kontinua halo di’ak ba família, komunidade no nasaun.
Nia mós husu joven sira atu promove dame la’ós de’it iha Loron Finadu, maibé iha loron-loron, hodi prevene konflitu no hametin koesaun sosiál.
“La’ós de’it iha Loron Finadu; iha loron hotu-hotu ita presiza kria unidade no dame,” dehan Xanana.
Primeiru-Ministru ko’alia mós kona-ba konflitu ne’ebé envolve grupu arte marsiais, no hatete katak diferensa organizasionál labele sai razaun atu baku malu, oho malu ka estraga propriedade.
Nia esplika katak, membru família no ema ne’ebé pertense ba grupu diferente bele iha desakordu, maibé tenke buka dalan atu rezolve problema ho diálogu, la’ós violénsia.
Xanana kompara situasaun ne’e ho arte marsiais hanesan taekwondo, ne’ebé bele sai dalan ba joven sira atu kompete, dezenvolve abilidade no lori naran Timor-Leste ba kompetisaun iha rai-li’ur.
Nia afirma katak, objetivu desportu no arte marsiais tenke promove disiplin no kompetisaun saudável, la’ós uza abilidade atu ataka ema seluk.
Iha asuntu seluk, Xanana ko’alia kona-ba enkontru ho membru Konsellu Superiór Majistratura, Prezidente Tribunál Rekursu no juís sira, ne’ebé hala’o iha loron 15 Outubru.
Nia la fó detallu kona-ba rezultadu enkontru ne’e, maibé esplika katak asuntu judisiál tenke rezolve liuhusi instituisaun kompetente, ho respeitu ba independénsia judisiál.
“Governu labele interfere iha prosesu judisiál; instituisaun kompetente mak tenke rezolve problema sira,” dehan Xanana.
Prezidente Repúblika José Ramos-Horta mós hatete katak diálogu sei kontinua atu buka solusaun ba problema sira ne’ebé temi iha setór justisa.
(eme)
