DILI, STLTIMORLESTE.com – Prezidente Repúblika (PR), José Ramos-Horta no Ministru Komérsiu no Indústria Nino Pereira diskute kooperasaun ho Koreia do Sul, expo komérsiu internasionál no programa sosial Natal do Povo.
Enkontru ne’e hala’o iha Palásiu Prezidensiál Nicolau Lobato, kinta (29/10), hodi koordena preparasaun ba vizita diplomátika Prezidente Repúblika nian ba Koreia do Sul no analiza inisiativa ekonómika no sosial.
Ministru Nino Pereira hatete katak, Timor-Leste no Koreia do Sul sei asina Memorandu Entendimentu (MoU) iha 6 Novembru 2026, ho objetivu atu hametin kooperasaun iha área propriedade intelektuál.
“Memorandu ida ne’e sei estabelese kooperasaun ba asisténsia téknika, fahe koñesimentu no esperiénsia, no dezenvolve parseria ba tempu naruk,” dehan Nino Pereira.
Akordu ne’e sei envolve Ministériu Komérsiu no Indústria Timor-Leste nian no Ministériu Propriedade Intelektuál Koreia do Sul nian. Parseria ne’e sei apoia estudu kona-ba estabelesimentu eskritóriu propriedade intelektuál iha Timor-Leste.
Preparasaun ba inisiativa ne’e inklui dezenvolvimentu kuadru legál, formasaun rekursu umanu no asisténsia téknika, ho apoiu husi instituisaun relevante no organizasaun internasionál iha área propriedade intelektuál.
Aleinde kooperasaun bilateral, enkontru ne’e mós aborda preparasaun ba Dili International Trade Expo and Forum, eventu ne’ebé iha objetivu atu liga empreza nasionál no internasionál.
Eventu ne’e sei kria oportunidade ba empreza sira atu halo negosiasaun, promove produtu lokál no buka asesu ba merkadu internasionál, hodi apoia dezenvolvimentu komérsiu no ekonomia nasionál.
Enkontru ne’e mós analiza programa Natal do Povo, inisiativa Prezidente Repúblika nian ne’ebé foka ba apoiu sosial ba komunidade vulnerável.
Ministru Nino Pereira hatete katak Ministériu Komérsiu no Indústria sei kontribui ba programa ne’e liuhusi distribuisaun ai-han no sasán nesesidade bázika ba komunidade sira ne’ebé presiza apoiu.
Programa Natal do Povo ne’e iha objetivu atu fó apoiu konkretu ba sidadaun sira, liuliu komunidade vulnerável, durante períodu selebrasaun Natal.
(eme)
