DILI, STLTIMORLESTE.com — Primeiru-Ministru (PM), Kay Rala Xanana Gusmão defende investimentu ba feto iha mikroempreza, turizmu no agrikultura hodi aumenta produsaun lokál no hamenus importasaun.
Xanana hato’o deklarasaun ne’e ba jornalista sira, hafoin enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairo Pité, Kinta-feira (29/10/2026).
Primeiru-Ministru subliña katak feto iha papél importante iha dezenvolvimentu nasionál, liuliu iha setór mikroempreza, turizmu no agrikultura, atu aproveita rekursu lokál no kria oportunidade ekonómika.
“Investe agora ba feto sira, liuliu iha mikroempreza, turizmu no agrikultura, atu aproveita produtu lokál no hamenus importasaun,” dehan Xanana.
Nia mós temi partisipasaun Timor-Leste iha konferénsia CPLP kona-ba kombate krime organizadu, fraude dijitál no jogu ilegál, no kooperasaun ho nasaun membru ASEAN.
Iha Konferénsia Nasionál Feto Empreendedora 2026, ne’ebé hala’o durante loron rua iha Sentru Konvensaun Dili, Xanana enkoraja feto emprezária sira atu dezenvolve negósiu ho planeamentu no pasiénsia.
Eventu ne’e halibur reprezentante governu, diplomata no feto emprezária sira hosi munisípiu 13 no Ataúru, ho objetivu promove empoderamentu ekonómiku feto nian no dezenvolvimentu sustentável.
“Ha’u husu ba imi, nu’udar feto emprezária, atu hanoin naruk no dezenvolve imi-nia negósiu neineik-neineik,” Xanana enfatiza.
Nia mós enkoraja empreendedora sira atu produz sasán orgániku ho kualidade aas, hodi aumenta kompetitividade iha merkadu lokál no internasionál.
Xanana hateten katak, Governu kompromete atu hamenus dependénsia Timor-Leste ba produtu importadu, inklui liuhusi Banku Dezenvolvimentu Nasionál, ne’ebé fasilita asesu ba kréditu ba empreza mikro, ki’ik no médiu.
“Ha’u fó apoiu tomak ba feto emprezária sira, tanba imi lori responsabilidade boot iha moris loron-loron,” dehan Xanana.
Inisiativa Women in Business (WiB) mós kompromete atu transforma konferénsia ne’e ba programa anuál sustentável, no hato’o relatóriu públiku kona-ba progresu iha Outubru 2027.
Programa ne’e iha objetivu atu hametin papél feto sira-nian, la’ós de’it hanesan empreendedora, maibé mós investidora no empregadora iha dezenvolvimentu ekonómiku nasionál.
(eme)
