BAUCAU, STLTIMORLESTE.com – Fehuk midar nu’udar produtu lokál ne’ebé iha kor oioin no fonte nutrisaun importante ba saúde umana, aleinde sai hahán ne’ebé fó enerjia ba isin.
Iha Munisípiu Baucau, liuliu iha Suku Ostico, Triloca no Bucoli, fehuk midar sai produtu lokál ne’ebé komersiante sira fa’an iha estrada ninin, dalan prinsipál Baucau–Dili.
Sidadaun sira husi Munisípiu Baucau, Viqueque no Lautém ne’ebé viaja ba Dili dala barak haree no sosa fehuk midar ne’ebé komunidade lokál sira fa’an iha área refere.
Bazeia ba informasaun nutrisaun ne’ebé aprezenta iha kampaña saúde Fundasaun Klinika Lafaek Diak, fehuk midar iha kor oioin, inklui mutin, laranja, roxu no kinur, ho kompozisaun nutriente no benefísiu ne’ebé diferente.
Fehuk midar kor mutin iha fibra ne’ebé ajuda prosesu dijestaun, regula movimentu intestinu no kontribui ba kontrolu nivel açúkar iha ran bainhira konsumu nu’udar parte husi hahán ekilibradu.
Fehuk midar kor laranja riku ho beta-karotenu, ne’ebé isin transforma sai vitamina A atu ajuda mantein saúde matan, sistema imunidade no saúde kulit nian.
Fehuk midar kor roxu iha antioxidante, liuliu antosianina, ne’ebé ajuda proteje selula isin nian husi estragu kauza husi radikál livre.
Enkuantu fehuk midar kor kinur mós iha vitamina no antioxidante ne’ebé kontribui ba saúde jerál no ajuda proteje selula isin nian.
Tanba ne’e, konsumu fehuk midar nu’udar parte husi hahán ekilibradu bele kontribui ba nutrisaun no saúde família.
Lafaek Diak Promove Fehuk Midar Kor Oioin ba Nutrisaun
Médiku Jerál, Sirineo Piedade Pinto, esplika katak iha programa ne’e, pesoál klínika prepara no te’in fehuk midar kor haat, hamutuk ho hahán nutritivu seluk, atu fó han ba labarik no inan isin-rua sira ne’ebé mai halo konsulta saúde.
“Programa ida ne’e programa regular ne’ebé kada semana ami hala’o. Normalmente, to’o ema na’in 70 mak mai, inklui labarik ki’ik no inan isin-rua,” Sirineo hateten ba jornalista sira iha Klínika Lafaek Diak, Triloca, Baucau Vila, Sesta (30/10/2026).
Nia informa katak benefisiáriu sira mai husi Suku Bahu, Triloca no Bucoli, Postu Administrativu Baucau Vila, no Suku Ostico, Postu Administrativu Vemasse.
Sirineo afirma katak objetivu programa ne’e atu promove produtu lokál ne’ebé riku ho nutriente, hodi ajuda hadi’a nutrisaun no suporta kresimentu saudável ba labarik sira.
“Objetivu ami fó han ba sira atu promove hahán lokál ho nutrisaun ne’ebé aas, hodi suporta labarik sira nia saúde. Tanba ita hatene katak rai Timor-Leste iha produtu lokál barak ne’ebé riku ho nutriente no importante ba saúde,” nia komenta.
Iha fatin hanesan, inan Florabela da Silva, husi Suku Triloca, hateten katak Klínika Lafaek Diak sai fatin importante ba komunidade, tanba aleinde hetan atendimentu saúde, sira simu mós edukasaun kona-ba oinsá atu uza produtu lokál nu’udar hahán nutritivu.
“Fehuk ne’e ita hatene de’it atu tunu, daan no sona, maibé iha ne’e sira prepara ho maneira diferente, te’in no kahur hamutuk ho hahán seluk ne’ebé fó benefísiu ba labarik sira nia saúde,” Florabela hateten.
Nia konsidera katak edukasaun kona-ba preparasaun hahán lokál bele ajuda família sira aumenta koñesimentu atu hili no prepara hahán nutritivu ba sira-nia oan.
(tom)
