DILI, STLTIMORLESTE.com – Sekretariu Estadu Komunikasaun Sosiál (SEKOMS) to’o fulan Outubru 2026, fó ona formasaun ba joven no funsionáriu públiku na’in 2.000 resin, nu’udar parte husi programa Governu Konstitusionál IX atu hametin kapasidade rekursu umanu iha área komunikasaun sosiál.
Sekretáriu Estadu Komunikasaun Sosiál, Expedito Loro Dias Ximenes ba jornalista sira hafoin Enseramentu Programa formasaun ba funsionáriu Ministeriu Ensino Superior Siensia no Kultura (MESSC) kona ba hakerek Imprensa nian neebe fasilita husi SEKOMA iha Salaun Enkontru Institutu Siencia Cristal (ISC) Balide Dili, Sesta (30/10/2026).
Nia dehan, programa formasaun ne’e inklui área televizaun, rádiu, multimédia no hakerek imprensa, ho objetivu atu hasa’e koñesimentu no abilidade partisipante sira iha komunikasaun.
Tuir Expedito, programa ne’e la’ós foka de’it ba funsionáriu ministériu sira, maibé estende mós ba joven sira, estudante eskola sekundária no komunidade iha postu administrativu no munisípiu sira.
“Objetivu mak atu joven sira bele aprende oinsá halo reportagem, hakerek komunikadu imprensa ho di’ak, koordena televizaun no halo komunikasaun públika ho efetivu,” nia esplika.
Nia hatutan katak, partisipante sira ne’ebé kompleta formasaun sei simu sertifikadu ka kredensiál nu’udar prova ba partisipasaun no kapasidade ne’ebé sira hetan.
Expedito mós konfirma katak, programa formasaun sei kontinua iha tinan 2027, inklui kolaborasaun ho média ofisiál, funsionáriu protokolu no jornalista sira.
Ba jornalista sira, SEKOMS sei servisu hamutuk ho Konsellu Imprensa atu hala’o formasaun espesífika, liuliu kona-ba téknika hakerek notísia no dezenvolvimentu kapasidade profisionál iha média rádiu no imprensa.
Aleinde formasaun jerál, SEKOMS liuhosi Direksaun Nasionál Téknika no Formasaun Komunikasaun (SEPTEK) sei dezenvolve mós formasaun téknika iha área multimédia, hakerek imprensa no uza termu tékniku iha setór espesífiku, hanesan saúde, defeza, seguransa no finansas públikas.
Iha okaziaun ne’e, Expedito hato’o agradese ba Ministériu Ensinu Superior, Siénsia no Kultura, Institutu Siénsia Kristal no instituisaun parseira sira ne’ebé kontribui ba implementasaun programa formasaun.
Formasaun ne’ebé hala’o iha ISC ne’e envolve partisipante hamutuk na’in 29, ho objetivu atu hametin koñesimentu no kapasidade sira-nian iha área komunikasaun sosiál.
Iha biban nee, Teresa Maria de Carvalho, nu’udar Asesora ba Ministru Ensinu Superior, responsavel ba apoiu Kabinete Ministru no Kontrolu Kualidade Ministériu hatoo Obrigado wain ba SEKOMS neebe hasae ona abilidade funsionáriu MESSC nain 29 atu hakerek imprensa.
“Agora, ami hakarak atu hametin no dezenvolve tan kapasidade profisionál sira, atu nune’e sira bele hala’o knaar no responsabilidade iha Ministériu ho di’ak. Ami hein katak profisionál sira bele kontribui liután ba Ministériu, liuliu iha prosesu hadi’a no hametin sistema servisu, hodi asegura katak informasaun ne’ebé Ministériu fahe ba públiku no instituisaun relevante sira bele sai klaru, loos no kualifikadu.
(jos)
