DÍLI, STLTIMORLESTE.com – Ministériu Edukasaun (ME) sei hahú prosesu reforma kurríkulu ba Ensinu Sekundáriu Jerál (ESJ) no Ensinu Tékniku-Vokasionál (TEKVO) iha tinan 2027, hodi adapta kurríkulu ho nesesidade no realidade edukasaun iha Timor-Leste.
Koordenadór Gabinete Unidade Kurríkulu Nasionál ME, João Mau Pelu, fó informasaun ne’e ba STL, Sesta-feira (30/10/2026), iha Dili.
João Mau Pelu esplika katak, reforma kurríkulu ne’e bazeia ba orientasaun husi lideransa nasionál, no konsidera mós katak kurríkulu ensinu sekundáriu ne’ebé eziste agora kleur ona, nune’e presiza halo atualizasaun no adapta ba realidade atuál.
“Kurríkulu ba ensinu sekundáriu ne’e hanesan orientasaun husi Excelénsia na’in rua, no haree mós ba realidade katak kurríkulu ensinu sekundáriu kleur ona. Tanba ne’e, presiza halo kontestualizasaun no reforma. Agora ita iha faze preparasaun ba reforma, depois ita sei halo avaliasaun,” nia dehan.
Nia hatutan katak, prosesu reforma ba kurríkulu ESJ no TEKVO sei hahú iha 2027, tanba kurríkulu iha nivel ensinu rua ne’e presiza revizaun atu responde ba nesesidade aprendizajen no dezenvolvimentu edukasaun.
“Hanesan ohin Ministra mós ko’alia ona kona-ba kurríkulu iha nivel ensinu sekundáriu, oinsá atu halo reforma ba kurríkulu iha nivel ensinu ne’ebé hau temi ona. Iha 2027, tenke halo reforma ba kurríkulu ESJ no TEKVO,” nia afirma.
Ministra Edukasaun, Dulce de Jesus Soares hateten katak, ME haree ona melloramentu signifikativu iha área literasia no numerasia iha siklu dahuluk, implementasaun aula dinámika iha klase 7 no aprendizajen bazeia ba projetu.
Ministra esplika katak, ME kontinua halo revizaun ba kurríkulu ensinu sekundáriu, atu asegura implementasaun ne’ebé harmoniozu to’o 2029.
“Kurríkulu no materiál didátiku, ita haree ona melloramentu signifikativu iha literasia no numerasia iha siklu dahuluk, aula dinámika iha klase 7 no aprendizajen bazeia ba projetu ne’ebé inspiradór. Ami mós halo revizaun ba kurríkulu ensinu sekundáriu nian ba implementasaun harmonioza to’o 2029,” nia esplika.
(jac)
