DILI, STLTIMORLESTE.com – Primeiru-Ministru (PM), Kay Rala Xanana Gusmão hamutuk ho MOP lansa Sentru OHS, hodi hasa’e kapasidade traballadór no reforsa seguransa no saúde iha ambiente servisu.
Serimónia lansamentu Sentru Seguransa no Saúde iha Fatin Servisu (OHS) ne’e hala’o iha Ministériu Obras Públikas (MOP), Caicoli, Dili, Kinta (29/10/2026).
Iha nia diskursu, Primeiru-Ministru Kay Rala Xanana Gusmão hato’o apresiasaun ba Prezidente IGEADI, I.P., Ana Paula da Cruz, no Ministériu Obras Públikas, tanba sira-nia servisu maka’as no inisiativa atu harii Sentru OHS, ne’ebé sei kontribui ba hasa’e kapasidade no koñesimentu rekursu umanu Timor-Leste nian.
“Hau hato’o obrigadu wa’in mos ba Governu Japaun, Korea, Portugal no parseiru dezenvolvimentu sira husi mundu tomak, ne’ebé fó apoiu ba dezenvolvimentu Timor-Leste iha setór oioin,” dehan Primeiru-Ministru.
Iha opoetunidade nee Ministru Obras Públikas, Samuel Marçal, hateten katak Sentru OHS ne’e iha importánsia boot atu asegura katak traballadór sira hetan formasaun no treinamentu adekuadu kona-ba prosedimentu seguransa, utilizasaun ekipamentu no prevensaun risku durante hala’o atividade servisu.
Nia esplika katak, operadór ekipamentu tenke iha koñesimentu no kapasidade téknika ne’ebé sufisiente atu opera mákina ho seguru, tuir regra no prosedimentu ne’ebé estabelese ona, hodi prevene asidente no evita danos ba ekipamentu.
Aleinde formasaun ba operadór sira, Ministru Samuel mós enfatiza responsabilidade kompanhia sira atu asegura manutensaun regular ba ekipamentu, halo kontrolu ba kondisaun mákina no garante katak ekipamentu hotu-hotu iha kondisaun seguru antes uza iha fatin servisu.
Nia subliña katak, kuidadu ba ekipamentu no aplikasaun rigorozu ba regra seguransa mak elementu importante atu hasa’e produtividade, garante durabilidade ekipamentu no proteje vida no saúde traballadór sira.
(jos)
