DÍLI, STLTIMORLESTE.com – Komisaun Anti Korrupsaun (KAK) alerta funsionáriu públiku sira atu labele uza karreta Estadu ba interese privadu durante loron feriadu.
Komisáriu Adjuntu KAK ba Investigasaun, Alvaro Maria Freitas, hateten katak utilizasaun veíkulu Estadu tenke tuir prosedimentu, inklui iha autorizasaun ka Guia de Marcha.
Nia hato’o avizu ne’e iha konferénsia imprensa, iha Faról, sexta-feira, atu prevene abuzu patrimóniu Estadu durante selebrasaun loron boot relijiozu.
Alvaro husu funsionáriu públiku sira atu uza veíkulu Estadu tuir finalidade servisu, liuliu durante loron 1 no 2 Novembru 2026, inklui loron 3 Novembru ne’ebé iha toleránsia.
“Veíkulu Estadu ne’ebé ita-nia funsionáriu sira utiliza tenke iha Guia de Marcha. Se la iha, KAK sei halo apreensaun.”
KAK lembra katak iha fulan Jullu 2026, funsionáriu públiku na’in hitu hetan detensaun tanba suspeita krime pekulatu de uzu.
Husi kazu hirak-ne’e, funsionáriu ida uza kupon mina Estadu nian ba karreta privadu, enkuantu funsionáriu na’in neen uza karreta Estadu durante loron feriadu.
Alvaro afirma katak kazu hirak-ne’e hotu-hotu hetan ona desizaun Tribunál liuhusi julgamentu sumáriu, ho pena fulan neen suspende nia ezekusaun ba tinan ida.
Maibé, nia hateten katak prosesu administrativa sei kontinua liuhusi Komisaun Funsaun Públika, atu konsidera sansaun tuir kompeténsia.
Atu hala’o fiskalizasaun, KAK sei servisu hamutuk ho Inspesaun Jerál Estadu, Patrimóniu Estadu, Komisaun Funsaun Públika, Direksaun Transporte Terrestre no PNTL.
Alvaro garante katak rekursu umanu no institusionál sufisiente atu kontrola movimentu karreta Estadu durante loron feriadu, liuliu veíkulu ne’ebé la iha autorizasaun.
KAK hato’o avizu ne’e atu asegura katak patrimóniu Estadu uza de’it ba interese servisu públiku, la’ós ba benefísiu pesoál.
Komunidade Suku Komoro husu funsionáriu públiku sira atu uza kareta Estadu tuir dalan no regra ne’ebé estabelese ona.
Samuel Mendonsa dehan katak, funsionáriu públiku sira tenke uza rekursu Estadu tuir nia finalidade no regulamentu ne’ebé vigora.
Nia mós husu autoridade kompetente sira atu la tolera funsionáriu ne’ebé uza kareta Estadu la tuir finalidade ofisiál, no aplika sansaun ba sira ne’ebé viola regra ne’ebé vigora.
(jos)
