DILI, STLTIMORLESTE.com — Prezidente Câmara Komérsiu Timor-Leste (CCI-TL), Jorge Serano husu Governu atu aumenta apoiu ba formasaun no dezenvolvimentu kapasidade setór privadu iha munisípiu sira, liuliu iha área agrikultura, kriasaun animál no turizmu komunitáriu, atu hametin atividade ekonómika no kria oportunidade empregu.
Jorge Serano hato’o pedidu ne’e ba jornalista sira iha entrevista ne’ebé hala’o iha Hotel Palm Spring, Kampung Alor, Dili, iha Kinta-feira (29/10/2026).
Nia subliña katak, koñesimentu no esperiénsia emprezáriu sira iha papel importante atu dezenvolve ekonomia nasionál.
Tuir nia, diversifikasaun atividade ekonómika presiza envolve setór privadu, liuliu emprezáriu lokál sira ne’ebé bele kontribui ba produsaun nasionál no kriasaun empregu.
Iha aprezentasaun ne’e, Jorge Serano temi dadus estatístika nasionál kona-ba atividade ekonómika hamutuk 76.000 no estatístika empresariál hamutuk 25.000. Nia uza dadus hirak-ne’e atu hatudu importánsia setór privadu iha ekonomia nasionál.
Nia mós konsidera katak formasaun ba emprezáriu no setór privadu iha munisípiu sira presiza sai prioridade, atu sira bele hadi’a kapasidade jestaun, dezenvolve negósiu no aproveita oportunidade iha merkadu.
Área agrikultura, kriasaun animál no turizmu komunitáriu mak setór sira ne’ebé bele hetan benefísiu hosi programa formasaun no apoiu tékniku, tanba iha oportunidade atu dezenvolve atividade produtiva iha komunidade.
Aleinde formasaun, Prezidente CCI-TL ne’e mós husu atu Governu konsidera alokasaun orsamentu espesífiku ba programa apoiu no dezenvolvimentu kapasidade setór privadu, liuliu ba empreza lokál no emprezáriu sira iha munisípiu.
Nia hanoin katak investimentu iha koñesimentu, esperiénsia no kapasidade emprezáriu sira bele ajuda hametin atividade ekonómika, aumenta produsaun lokál no kria oportunidade servisu ba komunidade.
Apoiu ba setór privadu, liuliu liuhosi formasaun no asesu ba rekursu, sai elementu importante atu promove diversifikasaun ekonomia no dezenvolvimentu ekonómiku ne’ebé inkluzivu iha Timor-Leste.
Iha boban nee, Vice Primeiru Ministru, Ministru Koordenador Asuntu Ekonomikus no Turizmu, Francisco Kalbuadi Lay dehan, Governu Timor Leste no Australia, iha komitmentu hodi apou iu Setór Privadu Sira hodi investe iha setor ekonomia atu diversifika ekonomia rai laran, tanba Governu Rai Rua serbisu iha setor oi-oin ba futuru.
(jos)
